Alimlər immun sistemi zəif olan dəri xərçəngi xəstələri ilə bağlı mühüm mexanizmi müəyyən ediblər

ABŞ-nin Texas Universitetinin MD Anderson Xərçəng Mərkəzinin alimləri immun sistemi zəif olan xəstələrdə qeyri-melanoma dəri xərçənginin inkişafı ilə bağlı mühüm elmi nəticə əldə ediblər. Araşdırma göstərib ki, bu xəstələrdə xərçənglə mübarizə aparan əsas immun hüceyrələri orqanizmdə mövcuddur, lakin onlar öz funksiyalarını lazımi səviyyədə yerinə yetirə bilmirlər.

Tədqiqatın nəticələri "Cell" elmi jurnalında dərc olunub.

Araşdırma çərçivəsində qeyri-melanoma dəri xərçəngi diaqnozu qoyulmuş 138 xəstənin şiş nümunələri təhlil edilib. Məlum olub ki, immun sistemi zəif olan xəstələrdə xəstəliksiz sağqalma müddəti daha qısadır. Bu qrupda beşillik ümumi sağqalma göstəricisi 33 faiz olduğu halda, immun sistemi normal olan xəstələrdə həmin göstərici 68,8 faiz təşkil edib.

Alimlər müəyyən ediblər ki, immun sistemi zəif olan xəstələrin şişlərində xərçəngə qarşı mübarizədə mühüm rol oynayan makrofaqlar mövcuddur. Lakin bu hüceyrələr digər immun hüceyrələri ilə effektiv əlaqə qura bilmir və xərçəng hüceyrələrinin tanınması üçün vacib siqnalları kifayət qədər ötürmür.

Tədqiqat zamanı aparılan təkhüceyrəli analizlər göstərib ki, bu xəstələrdə immun hüceyrələrinin növləri əsasən qorunub saxlanılsa da, onların reseptor müxtəlifliyi azalıb. Bu isə makrofaqların xərçəng hüceyrələrini tanımaq və onlara qarşı immun cavabı formalaşdırmaq imkanlarını məhdudlaşdırır.

Tədqiqatın həmmüəllifi Moran Amit bildirib ki, uzun illər immun sistemi zəif olan xəstələrdə əsas problemin immun hüceyrələrinin sayının az olması hesab edilirdi. Yeni nəticələr isə göstərir ki, həlledici amil hüceyrələrin sayı deyil, onların funksional vəziyyəti və bir-biri ilə qarşılıqlı əlaqəsidir.

Tədqiqat müəlliflərinin fikrincə, bu nəticələr immun hüceyrələrinin fəaliyyətini bərpa etməyə və ya gücləndirməyə yönəlmiş yeni müalicə üsullarının hazırlanmasına imkan yarada bilər. Onlar hesab edirlər ki, bu yanaşma gələcəkdə immun sistemi zəif olan dəri xərçəngi xəstələri üçün daha effektiv müalicə metodlarının işlənib hazırlanmasına töhfə verəcək.

mənbə: medicalxpress.com