Alimlər müəyyən ediblər ki, REM yuxusu zamanı beyin diqqətini xarici mühitdən daxili siqnallara yönəldir

İsveçrəli alimlər müəyyən ediblər ki, insan REM yuxusuna keçdikcə beyin xarici mühitdən gələn siqnallara daha az, orqanizmin özündən gələn siqnallara isə daha çox diqqət yetirir. Tədqiqatın nəticələri yuxu zamanı beynin ətraf aləmlə əlaqəsini tam kəsmədiyini, əksinə, məlumatların emalında prioritetləri dəyişdirdiyini göstərir.

Araşdırmanın nəticələri "Current Biology" jurnalında dərc olunub.

Tədqiqat Lozanna Universiteti və Cenevrə Universitetinin alimləri tərəfindən aparılıb. Araşdırmaya Lozanna Universitetinin Biologiya və Tibb fakültəsinin müəllimi, CHUV Universitet Xəstəxanasının Klinik Neyroelmlər şöbəsinin əməkdaşı Marzia De Luçiya və Cenevrə Universitetinin professoru Sofi Şvarts rəhbərlik ediblər.

Alimlərin sözlərinə görə, insan beyni oyaq olduğu vaxt həm xarici mühitdən, həm də orqanizmin daxilindən gələn çoxsaylı siqnalları eyni vaxtda qəbul edib emal edir. Lakin insan yuxuya getdikcə bu mexanizmin necə dəyişdiyi indiyədək tam aydın deyildi.

Bu sualı araşdırmaq üçün tədqiqatçılar 25 könüllünün beyin fəaliyyətini iki gecə ərzində elektroensefaloqrafiya (EEQ) vasitəsilə izləyiblər. Onlar iştirakçıların oyaq vəziyyətdə, eləcə də REM yuxusunun müxtəlif mərhələlərində səs siqnallarına və ürək döyüntülərinə beynin verdiyi reaksiyanı müqayisə ediblər. Nəticələr göstərib ki, insan REM yuxusunun dərin mərhələsinə keçdikcə xarici səslərə verilən sinir reaksiyası tədricən zəifləyir. Bunun əksinə olaraq, ürək döyüntülərindən gələn daxili siqnalların emalı güclənir.

Tədqiqatın rəhbərlərindən Marzia De Luçiyanın sözlərinə görə, söhbət beynin bütün siqnalları bloklamasından getmir. Əksinə, beyin diqqətini xarici mühitdən daxili proseslərə yönəldir.

Alimlər araşdırma zamanı beynin hansı siqnallara üstünlük verdiyini göstərən yeni göstərici – "audio-kardio indeksi" də hazırlayıblar. Bu indeks beynin xarici səslərlə müqayisədə ürək döyüntülərindən gələn siqnallara nə dərəcədə həssas olduğunu qiymətləndirməyə imkan verir.

Tədqiqat müəllifləri hesab edirlər ki, gələcəkdə bu göstəricidən koma və ya minimal şüur vəziyyəti kimi qiymətləndirilməsi çətin olan hallarda xəstələrin şüur səviyyəsini daha dəqiq müəyyənləşdirmək üçün istifadə oluna bilər.

mənbə: medicalxpress.com