Bakı-Sumqayıt yolu belə genişləndiriləcək

Anar Nəcəfli: “Həm yol geniş olacaq, həm də istiqamətlər üzrə sıxlıq aradan qaldırılacaq”

Bakı-Sumqayıt yolunun acınacaqlı vəziyyəti hər kəsə məlumdur. Uzun müddətdir öz həllini tapmayan tıxac problemi yoldan istifadə edən vətəndaşlara əziyyət verir. Lakin hazırda Bakı-Sumqayıt yolunun genişləndirilməsi istiqamətində işlərə başlanılıb. AYNA əməkdaşı bu mövzuda Azərbaycan Avtomobil Yolları Dövlət Agentliyinin (AAYDA) mətbuat xidmətinin rəhbəri Anar Nəcəfli ilə həmsöhbət olub.

- Anar müəllim, Bakı-Sumqayıt yolunun genişlənmə prosesi ərzində hansı tədbirlər nəzərdə tutulur?

- Ölkə başçısının tapşırığına uyğun olaraq Bakı-Sumqayıt yolunun genişlənməsi prosesinə başlanılıb. Masazır qəsəbəsinə qədər olan hissədə hər iki istiqamətdə hərəkət zolaqları genişlənir. Bununla əlaqədar olaraq yol kənarlarında olan süni təpəciklər sökülür, körpülərin alt hissəsində genişləndirmə işləri aprılır. Xırdalan dairəsinə qalxan və düşən istiqamətdə qeyri-yaşayış obyektləri var ki, onların da qanunvericiliyə uyğun olaraq kompensasiya ödənilərək söküntüsü aparılacaq. Digər tərəfdən, yaşıllıqların və kommukasiya xətlərinin köçürülməsi də nəzərdə tutulur. Dairənin altından keçən tunel iki hərəkət zolağı istiqamətində genişləndiriləcək və əlavə tunellər inşa olunacaq. Bu işlər yekunlaşandan sonra artıq tunelin genişləndirilməsi istiqamətində də işlər aprılacaq.

- Deməli, Xırdalan dairəsinin altından keçən tunelin forması indiki kimi qalacaq və sadəcə olaraq içərisindəki zolaqların sayı artırılacaq?

- Əlavə olaraq hər bir istiqamətdə iki zolaq artırılacaq. Ola bilər ki, ayrıca tunel inşa olunsun, yaxud da mövcud tunel genişləndirilsin.

- Belə təkliflər var ki, Xırdalan dairəsi və aşağısındakı tunel bir növ Masazır dairəsi formasında olsa, daha effektiv olar. Yəni üst yol düz istiqamətdə gedənlər üçün, alt yol isə sağa-sola hərəkət edənlər üçün ayrılsın. Belə bir format mümkündürmü?

- Əslində, istiqamətlər üzrə nəzərdə tutulan hərəkətlər tənzimlənəcək. Yəni mövcud olan iki zolaqlı tunel dəmir beton maneələrlə kəsiləcək. “20 yanvar” istiqamətindən Sumqayıta tərəf uzanan, “Şamaxinka”dan keçən tunelindən çıxan nəqliyyat vasitələri həmin o iki zolağa daxil olduqda birbaşa olaraq Masazır-Ceyranbatan-Sumqayıt-Quba istiqamətində heç bir maneə olmadan birbaşa hərəkət edə biləcək. Digər iki zolaq Xırdalan-Binəqədi-Biləcəri-Masazır və Şamaxı istiqamətlərində hərəkət edən nəqliyyat vasitələri üçün nəzərdə tutulacaq. Yəni, bu istiqamətlər ayrılacaq ki, bir-birinə maneçilik törətməsinlər. Nəticədə isə həm yol geniş olacaq, həm də istiqamətlər üzrə ərazidə sıxlıq aradan qaldırılacaq.

- Bu arakəmsə haradan başlayacaq?

- Tunelin Moskva prospektindən Beynəlxalq Avtovağzala açılan hissəsindən başlayacaq və üzü Xırdalan dairəsinədək davam edəcək. Avtomobillər üçün heç bir maneə olmayacaq. Necə ki, nəqliyyat vasitələri Xırdalan tunelindən çıxıb iki zolaqla birbaşa Sumqayıt-Ceyranbatan istiqamətinə gedir, digərləri isə dönür Masazır istiqamətinə, bu da elə olacaq.

- Nəqliyyat vasitələri üçün sağdan sola, soldan sağa keçid verilməyəcək?

- Giriş yolun əvvəlində olacaq. Ortalarda olması təhlükəlidir.

- Belə olduğu təqdirdə, “Şamaxinka”dan Beynəlxalq Avtovağzala açılan tuneldən də dəyişiklik olacaq?

- Birinci mərhələdə Xırdalan dairəsi ətrafında işlər aparılacaq və o hissədə problem aradan qaldırılacaq. Növbəti mərhələdə isə biz planlaşdırmışıq ki, əks istiqamətdə olan sıxlıq da aradan qaldırılsın. Onun qarşısını almaq üçün müəyyən layihələr var ki, hazırda onların üzərində iş apaılır. Sözügedən yerdə genişləndirmə mümkün deyil. Ona görə də alternativ yollar çəkiləcək.

- Sumqayıtdan Bakıya gələn yolda da daim ciddi tıxaclar yaşanır. Xüsusilə, “Ekologiya postu”nu keçəndən bir qədər sonradan başlayaraq, “20 yanvar” metrostansiyasınadək. Avtovağzalın yaxınlığında sağdan sola keçilməsini qadağan edən xətt çəkilib ki, nəticədə sağ cinahdakı 2-3 zolaqda təkəmseyrək hərəkət olsa da, son cinahda hərəkət dayanır. Bu haqda nə düşünürsünüz?

- Orada da müəyyən dəyişiklik olacaq. Həmin o zolaqların paylanması baş tutacaq. Belə ki, dairəvi yolun altından Alatavaya çıxan tunelin inşa olunması nəzərdə tutlur ki, alternativ yol kimi istifadə olunsun. Yəni “20 yanvar” dairəsi istiqamətində şəhərə alternativ daha bir giriş olsun və sürücülər həmin yoldan da istifadə edə bilsinlər.

- Bəs düz istiqamətdə hərəkət edənlər üçün sol tərəfdəki zolaqların sayı artacaqmı?

- Xeyr, artırılmayacaq! Sadəcə istiqamətlər üzrə zolaqlar paylanılacaq.

- Bütün bu dedikləriniz nə vaxt yekunlaşacaq?

- Xırdalan dairəsi ətrafında davam edən prosesin may ayının sonuna qədər yekunlaşması planlaşdırılır. Ondan sonra isə ikinci mərhələyə başlanılacaq. İkinci mərhələnin başa çatması isə ilin sonunda mümkün olacaq.