Cənubi Qafqaz Boru Kəmərinin ötürücülük gücü 12% artıb

Bu ilin birinci rübündə Cənubi Qafqaz Boru Kəməri (CQBK) və genişləndirilmiş boru kəməri (CQBKG) ilə bağlı fəaliyyətlərə təqribən 12 mln. ABŞ dolları əməliyyat xərcləri sərf edilib.

Bu barədə “Report” “BP-Azerbaijan” şirkətinin tərəfdaşları adından 2020-cu ilin birinci rübünün yekunları ilə bağlı yaydığı hesabatda qeyd edilib.

Bu, 2019-cu ilin birinci rübünün nəticələri müqayisədə 3 mln ABŞ dolları və ya 33,3% çoxdur.

Bu ilin birinci rübündə boru kəmərinin əsaslı xərcləri 2 mln ABŞ dolları təşkil edib ki, bu da 2019-cu ilin birinci rübünün göstəriciləri ilə müqayisədə 15 mln və ya 8,5 dəfə azdır.

Rüb ərzində CQBK-nin gündəlik orta ötürücülük gücü 33,6 mln. kubmetr olub ki, bu da 2019-cu ilin birinci rübünün göstəriciləri ilə müqayisədə 3,6 mln kubmetr və ya 12% çoxdur.

Qeyd edək ki, CQBK 2006-cı ilin sonlarında istismara verilib və Azərbaycan, Gürcüstan və Türkiyəyə "Şahdəniz" qazını çatdırır, CQBKG isə kommersiya qaz həcmlərinin Türkiyəyə təhvil verilməsinə 2018-ci ilin iyun ayında başlayıb.

Xatırladaq ki, CQBK şirkətinin sərmayədarları qismində BP (28,8%), "AzSCP" (10%), "SGC Midstream" (6,7%), "Petronas" (15,5%), "LUKoil" (10%), NİCO (10%) və TPAO (19%) şirkətləri çıxış edir.

Mənbə: