Türkiyədə keçirilən BMT-nin iqlim danışıqları bazar günü yekun razılaşmaya yaxınlaşıb. COP31-in Türkiyə və Avstraliyadan olan həmsədrləri qlobal istiləşmə ilə mübarizədə növbəti addımlarla bağlı konsensus əldə olunacağına ümid edərək yeni təkliflər paketini təqdim ediblər.
Oxu.Az "Reuters" agentliyinə istinadən xəbər verir ki, yeni razılaşma layihəsi Antalyada keçirilən konfransın planlaşdırılan başaçatma tarixindən iki gün sonra dərc olunub.
Sənəd qəbul ediləcəyi təqdirdə, qlobal istiləşmənin 1,5 dərəcə Selsi həddini aşmağa doğru irəlilədiyi ilk dəfə rəsmi şəkildə etiraf olunacaq. Ölkələr daha əvvəl bu həddin aşılmasının qarşısını almağa çalışacaqlarına dair öhdəlik götürüblər.
Bununla yanaşı, layihədə atmosferdən karbon qazının çıxarılması texnologiyalarının inkişafının sürətləndirilməsinə çağırış yer alıb. Məqsəd gələcəkdə qlobal temperatur artımının qeyd olunan həddi aşmasının qarşısını almaqdır.
Alimlərin iqlim dəyişikliyinin əsas səbəbi hesab etdikləri qalıq yanacaqlar sənəddə birbaşa qeyd olunmayıb. Məhz bu məsələ gərgin danışıqlar zamanı əsas fikir ayrılıqlarından birinə çevrilib. Bunun əvəzinə sənəddə əvvəlki COP konfransında hökumətlərin neft, qaz və kömürdən mərhələli şəkildə uzaqlaşmaq barədə əldə etdikləri razılaşmaya istinad edilib.
COP31-in sədri Murat Kurum bazar günü səhər saatlarında keçirilən plenar iclasda bildirib:
"Biz bütün tərəflərin razılaşa biləcəyi bir mətn təqdim etdiyimizi düşünürük".
O, razılaşmanın təsdiqlənməsi məqsədilə konfransın səhər saatlarında işini bərpa edəcəyini açıqlayıb.
Yeni sənəd danışıqlara rəhbərlik edən Avstraliya və ev sahibi Türkiyə ilə yanaşı, dünyanın müxtəlif ölkələrini təmsil edən təxminən 200 nümayəndə heyəti arasında aparılan intensiv məsləhətləşmələrin nəticəsi olub. Danışıqlarda zəngin və yoxsul, böyük və kiçik dövlətlərin nümayəndələri iştirak ediblər.
Konfransın rəhbərliyi nümayəndə heyətlərinə razılaşma layihəsi ilə bağlı mümkün etirazlarını bildirmək üçün bir neçə saat vaxt verib.





Şərhlər
Hələ təsdiqlənmiş şərh yoxdur.
Şərh yazın
Şərh yazmaq üçün hesabınıza daxil olun və e-poçtunuzu təsdiqləyin.