Cyrcle Phone adlı yumru smartfon təqdim olundu

Smartfonun hazırlanmasına beş il vaxt sərf olundu.

Consumer Electronics Show 2020 sərgisində göstərilən ən qəribə smartfonlardan biri Cyrcle Phone oldu. Bəli, bu, düzbucaqlı deyil, yumru formada olan smartfonun prototipidir.

Beş illik əziyyətdən sonra konsept müəllifləri bütün dünyaya gözlənilməz smartfonu göstərmək üçün ilin ən böyük texnologiya sərgisindən istifadə etmək qərarına gəldilər. Cihazı hazırlayanlar iddia edirlər ki, onlar daha rahat korpus hazırlamaq üçün uzun müddət işləyiblər. Cyrcle Phone problemsiz istənilən cibə sığır və əldə tutmaq çox rahatdır. Problem olmasa smartfonun final versiyası bir ildən sonra satışa çıxarılacaq.

Qəribəliklər bununla bitmir. Cyrcle Phone qulaqcıq qoşmaq üçün 1 deyil, 2 ədəd 3,5mm birləşdirici əldə edib. Nə üçün? Komandanın rəhbəri Kristina Sirin sözlərinə görə, bu qərar səs splitteri ehtiyacının aradan qaldırılması üçün qəbul edilib. İş burasındadır ki, gənc nəsil çox vaxt musiqini bir cihazdan birlikdə dinləyir, bu konstruktiv özəllik xüsusilə onlar üçün nəzərdə tutulub.

Şirkətin proqram təminatını konfiqurasiya etmək üçün çox işi var, belə ki, nə Android əməliyyat sisteminin özü, nə də proqramlar belə ekranlarda işləmək üçün uyğunlaşdırılmayıb. Böyük ekranlı ağıllı saatlar üçün uyğunlaşdırılmış tətbiqlər istisnadır.