Ərdoğan: "Bəşəriyyət ən ağır iqlim böhranlarından biri ilə üz-üzə qalıb"

Bəşəriyyət xüsusən də həddindən artıq istehlaka meyillilik səbəbindən tarixinin ən ağır iqlim böhranlarından biri ilə üz-üzə qalıb.

Oxu.Az TASS-a istinadən xəbər verir ki, bu barədə Türkiyə Prezidenti Rəcəb Tayyib Ərdoğan Antalyada keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyası (COP31) çərçivəsində ölkə liderlərinin ikigünlük sammitinin açılış mərasimindəki çıxışında bildirib.

"Qlobal istiləşmə və bioloji müxtəlifliyin məhv olmasından tutmuş, təbii sərvətlərin həddindən artıq israfına, ərzaq təhlükəsizliyinə yaranan təhdidlərə və dağıdıcı iqlim fəlakətlərinə qədər bir çox ciddi problemlərlə qarşılaşırıq", - deyə Ərdoğan vurğulayıb.

Onun sözlərinə görə, insanların başqa bir səması, fərqli bir torpağı, dənizləri, okeanları və ya meşələri yoxdur. Türkiyə lideri əlavə edib:

"Bununla belə, bu gün bəşəriyyət, qismən də olsa, doymaq bilməyən həddindən artıq istehlak ehtirası ucbatından öz tarixinin ən dərin ekzistensial böhranlarından birinin içindədir".

Xatırladaq ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyası (COP31) 9-20 noyabr tarixlərində Türkiyənin Antalya şəhərində keçirilir. Tədbirdə 102 dövlətin liderləri və rəsmi nümayəndələri iştirak edirlər.