Fransız merlərin Bakıya qarşı qanunsuz addımı – Şərh

Biz Fransa ilə münasibətlərin ən yüksək səviyyədə inkişafını arzulayırıq. Ancaq beynəlxalq hüquq, Birləşmiş Millətlər Təşkilatının qəbul etdiyi qətnamələr, Avropa Şurasının, Avropa Parlamentinin, ATƏT-in Minsk Qrupunun sənədləri əsasında, ərazi bütövlüyümüz çərçivəsində, dünyanın heç bir ölkəsi tərəfindən tanınmayan qondarma rejimə dəstəyin verilməməsi istiqamətində aparılan işləri görmək istəyirik.

Bu sözləri Axar.az-a açıqlamasında analitik Ehtiram Aşırlı deyib. O bildirib ki, Fransa ilə münasibətlər ölkəmiz üçün böyük önəm daşıyır:

“Belə ki, iki ölkə arasındakı əlaqələr həm regionda sabitlik, həm də bölgənin inkişafı üçün böyük əhəmiyyət kəsb edir. Lakin təəssüf ki, son vaxtlar Fransanın bir neçə bələdiyyə rəhbəri tərəfindən Azərbaycan Respublikasının işğal edilmiş ərazilərinə qanunsuz səfərlər həyata keçirilib və bununla da beynəlxalq hüququn norma və prinsipləri, eləcə də Azərbaycanın qanunları kobud şəkildə pozulub. Fransa bələdiyyə başçılarının Azərbaycanın işğal olunmuş ərazilərinə qanunsuz səfərləri ölkələrimiz arasındakı münasibətlərin yüksək səviyyədəki inkişafına xələl yetirir. Bələdiyyə başçıları işğal olunmuş Azərbaycan torpaqlarına səfər etməklə Fransa və Azərbaycan arasında imzalanmış sazişlərə, sənədlərə zidd hərəkət edir, eyni zamanda, Fransanın özünün milli qanunvericiliyinə zidd və tam qanunsuz addımlar atır”.

Analitik vurğulayıb ki, bələdiyyə başçılarının belə bir addım atması öz-özlüyündə bir cinayətdir:

“Fikrimcə, belə səfərlər və Fransa hökuməti tərəfindən bu səfərlərə lazım olan qiymətin verilməməsi iqtisadi əlaqələrimizə ciddi xələl gətirə bilər. Düşünürəm ki, Azərbaycanın ərazi bütövlüyünə hörmət etməyən, qondarma rejimlə qeyri-qanuni sənədlər imzalayan, faktiki olaraq cinayəti dəstəkləyən, onu tanıyan, bələdiyyələrə lazım olan qiyməti verməyən ölkənin iş adamlarının Azərbaycan Xarici İşlər Nazirliyi tərəfindən nəzərətə götürülməsi məqsədəuyğun olar”.