“Gücləndirilmiş müştəri autentifikasiyasının tətbiqi Qaydası” təsdiqlənib

Azərbaycan Mərkəzi Bankının (AMB) İdarə Heyəti “Gücləndirilmiş müştəri autentifikasiyasının tətbiqi Qaydası”nı təsdiq edib.

Ens.az Report.az-a istinadən xəbər verir ki, bununla bağlı AMB-nin sədri Taleh Kazımov yeni qərar imzalayıb.

Bu Qayda “Ödəniş xidmətləri və ödəniş sistemləri haqqında” qanuna əsasən hazırlanıb, gücləndirilmiş müştəri autentifikasiyasının (GMA) tətbiqinin tələb edilmədiyi halları və ödəniş xidməti təchizatçılarının xidmətlərindən istifadə olunarkən tətbiq edilən GMA ilə bağlı tələbləri müəyyən edir.

Ödəniş xidməti təchizatçısının fəaliyyətinin bu Qaydadan irəli gələn tələblərə uyğunluğu daxili audit xidməti tərəfindən ən azı ildə 1 dəfə yoxlanılmalı, yoxlama üzrə hesabat hər il yanvarın 15-dən gec olmayaraq AMB-yə təqdim edilməlidir. Daxili auditin yoxlama üzrə hesabatı bu Qaydanın tələbləri üzrə qiymətləndirməni, habelə fırıldaqçılıq dərəcələrinin hesablanmasını və tələblərə uyğunluğu əks etdirməlidir.

Bu Qaydada istifadə olunan GMA və digər anlayışlar Qanunda müəyyən edilmiş mənaları ifadə edir.

AMB-nin Hüquq departamentinə bu Qərarın üç gün müddətində Hüquqi Aktların Dövlət Reyestrinə daxil edilməsi üçün Ədliyyə Nazirliyinə təqdim edilməsi tapşırılıb.