"Hazırda "Zvartnots" hava limanında qərarları Ermənistan sərhədçiləri verir" - Azatxanyan

"Artıq "Zvartnots" hava limanında sərhədin keçməsi ilə bağlı bütün qərarları Ermənistan sərhədçiləri verir".

Ens.az Bizimyol.info-a istinadən xəbər verir ki,bunu Ermənistan mətbuatına açıqlamasında Rusiya sərhəd xidmətinin veteranı, vaxtilə keçid məntəqəsi xidmətinə özü nəzarət edən Lev Azatxanyan deyib.

Onun sözlərinə görə, Ermənistan müstəqillik əldə edəndə ölkədə mütəxəssis yox olmayıb: "Və 1992-ci ildə Ermənistan ərazisində yerləşən Rusiya Sərhəd Qoşunlarının statusu haqqında Saziş imzalanan zaman "Zvartnots" hava limanında rus sərhədçiləri öz funksiyalarını yerinə yetirirdilər. Üstəlik, 1992-ci il müqaviləsində sərhədlərin Ermənistan Respublikasının qüvvələri tərəfindən onun mühafizəsi altına mərhələli şəkildə qəbul edilməsini nəzərdə tutduğunu nəzərə alaraq, 2005-ci ildə saziş imzalanıb və onun əsasında erməni sərhədçilərinin təlimi həyata keçirilib. Daha sonra tərəflər hava limanında birgə sərhəd təhlükəsizliyinə keçiblər. "Zvartnots"da erməni sərhədçilərin sayı daha çoxdur və vacib olan odur ki, vətəndaşların keçidi və ya keçidindən imtina ilə bağlı qərarı Ermənistan tərəfi verir. Hər hansı mübahisəli məsələ olarsa, qərarı Ermənistan tərəfi verir", - deyə Azatxanyan qeyd edib.

Onun sözlərinə görə, praktikada qeyri-adi vəziyyət yarananda erməni sərhədçilər məsləhət almaq üçün tez-tez rusiyalı həmkarlarına müraciət ediblər. Bundan əvvəl Ermənistan Milli Assambleyasının sədri Alen Simonyan bildirib ki, Rusiya sərhədçiləri Yerevan "Zvartnots" hava limanında xidmətini dayandırmalıdırlar.

Rusiyanın FTX-nin respublika üzrə sərhəd idarəsi erməni həmkarları ilə birlikdə 30 sentyabr 1992-ci il tarixli müqaviləyə əsasən Türkiyə və İranla sərhədlərin mühafizəsi xidmətini həyata keçirir. Departamentə dörd dəstə - Gümrü, Armavir, Artaşat və Meqridə, həmçinin "Zvartnots" hava limanında ayrıca nəzarət-buraxılış məntəqəsi daxildir.