Məhəmməd Tağı Sidqi - Xoşa sənilə həmavaz olduğum günlər

Məhəmməd Tağı Sidqi - Xoşa sənilə həmavaz olduğum günlər

Xoşa sənilə həmavaz olduğum günlər,
Həmişə həmdəmü həmraz olduğum günlər.

Düşəndə yada könül suzla güdazə düşər,
Nəvayi-sazla dəmsaz olduğum günlər.

Başımda şuri-sər, zülf bəzm vəslində,
Hasari-qəleyi-şahnaz olduğum günlər.

Rəqiblər səri-kuyində xaksarımdı,
Sənin yanında sərəfraz olduğum günlər.

Edib təfəül, oxurdum qəzəl hüzurunda,
Lisani-Hafizi-Şiraz olduğum günlər.

Olurdu navəki-peykanına hədəf sinəra,
Qəbili-çəşmi-çəpəndaz olduğum günlər.

Qolumu boynuna hər dəm həmayil eylərdim,
Şikari-busəyə şəhbaz olduğum günlər.

Sürudi-şeirlə şairliyi şüar eylədim,
Qəmində qafıyəpərdaz olduğum günlər.

Həmişə tutmuşdun Sidqinin sözün mənzur,
O gülüzarə nəxərbaz olduğum günlər.