Multi-vitaminlərin ürəyə faydası yoxdur

Multi-vitaminlərin ürək sağlamlığına faydası olmadığı bildirilib.

FaktXəbər bildirir ki, "Livescience"in xəbərinə görə, Alabama Universiteti alimlərinin apardığı araşdırma multi-vitaminlərin insanın ürək problemləri və ya infarktdan ölmə ehtimalı üzərində müsbət və ya mənfi təsirinin olmadığını göstərib.

Araşdırma çərçivəsində daha əvvəl multi-vitamin və mineral qəbulu ilə müəyyən ürək-damar problemləri arasındakı əlaqəni araşdıran 18 işin nəticələri qiymətləndirilib.

Sözügedən araşdırmada 5 ölkədə (ABŞ, Yaponiya, Fransa, İsveç və Almaniya) 2 milyondan çox insanın orta hesabla 12 il ərzində müşahidə edildiyi bildirilib.

Tədqiqatda multi-vitamin və mineral qəbul edən alan adamların ürək problemləri, infarkt və ya başqa bir ürək xəstəliyindən ölmə ehtimalının aşağı düşmədiyi və ya artmadığı müşahidə olunub.