Nazir: Ölkəmizdə yoluxma olan kimi ilk bunu etdik

Ölkəmizdə ilk koronavirusa yoluxma faktı qeydə alınan kimi ölkə ərazisində tədris prosesi dayandırıldı.

Axar.az xəbər verir ki, bunu Təhsil naziri Ceyhun Bayramov Operativ Qərargahın brifinqində deyib.

Nazir bildirib ki, bu qərar qəbul ediləndə dünyanın 12 ölkəsi bu addımı atmışdı, daha sonra 190 ölkədə tədris prosesi dayandırıldı:

"Bu addım göstərdi ki, ölkədə insanların sağlamlığı ön plandadır. Biz prosesin vacib mərhələsindəyik. Bundan sonra məhdudiyyətlərin aradan götürülməsində bizim üçün xoşagəlməz halların baş verməməsi üçün vətəndaşların məsuliyyətli olması vacibdir. Mən əminəm ki, hər bir vətəndaş bu tövsiyələrə əməl edərək, pozitiv nəticələrin artmasına kömək edəcək".

Nazir xatırladıb ki, martın 3-dən etibarən tədris dayandırılıb:

"Bizim əsas məqsədimiz təhsil alanlar üçün ən uyğun şəraiti yaratmaq idi. Mart ayından etibarən "Mədəniyyət" televiziyasında teledərslərə start verildi. Hər növbəti həftə bu dərslərin əhatəliyi genişləndi. Məktəbdənkənar və məktəbəqədər təhsillə bağlı dərslər, peşə təhsili ilə bağlı dərslər layihəyə əlavə edildi. Aprelin 28-də bu layihədə 1000-ci buraxılışın efirə getməsi planlaşdırılır. Bu layihədən 1 milyon 600 min şagird yararlanıb" .

C.Bayramov deyib ki, Azərbaycan bu addımı atan ilk dövlətlərdəndir. Digər ölkələr Azərbaycan təcrübəsindən istifadə edərək, bir ay sonra bu layihəyə başladılar:

"Eyni zamanda, "Virtual məktəb" layihəsi istifadəyə verildi. Məktəb proqramına uyğun olaraq bu layihədə şagird və müəllimlər arasında ünsiyyət yarandı. Bu günə qədər 600 şagird və 50 müəllim bu platformadan istifadə edir. Bu sistemdə onlayn yarışlar, ölkə çempionatları, intellektual oyunlar həftəlik əsasla həyata keçirilir".

Ceyhun Bayramov qeyd edib ki, Avropa Qızlar Riyaziyyat Olimpiadası mövcud vəziyyətə görə onlayn rejimdə keçirildi və 4 nəfərdən ibarət komandamız 16-17 aprel tarixlərində olimpiadada iştirak etdi:

"Ötən il qızlardan ibarət komandamız çox yüksək nailiyyət əldə etdi".

Mənbə: