Nərimanov Tibb Mərkəzinin taleyi ilə bağlı qeyri-müəyyənlik - TƏBİB-dən AÇIQLAMA

Nərimanov Tibb Mərkəzinin bir qrup əməkdaşı mərkəzin gələcək fəaliyyəti ilə bağlı yaranmış qeyri-müəyyənlikdən narahat olublar.

Bununla bağlı Oxu.Az-ın qaynar xəttinə kollektiv adından müraciət ünvanlanıb.

Müraciətdə qeyd olunub ki, mərkəzin əsas binası təmirə bağlandıqdan sonra kollektiv son 4-5 ildir fəaliyyətini müvəqqəti olaraq 6 saylı Uşaq Xəstəxanasının binasında davam etdirir. Lakin əsas binanın təmiri artıq başa çatsa da, həmin binanın yeni yaradılacaq Pediatriya Mərkəzinə veriləcəyi barədə məlumat yayılıb.

Bildirir ki, bu məlumat doğru olarsa, Nərimanov Tibb Mərkəzinin harada fəaliyyət göstərəcəyi və əməkdaşların taleyi ilə bağlı onlara heç bir rəsmi məlumat verilməyib. Onlar həmçinin hazırda fəaliyyət göstərdikləri binanın şəraitinin müasir tibb müəssisəsinin tələblərinə cavab vermədiyini, bunun iş prosesinə və göstərilən tibbi xidmətin keyfiyyətinə mənfi təsir etdiyini qeyd edirlər.

Əməkdaşlar aidiyyəti qurumlardan Nərimanov Tibb Mərkəzinin gələcək fəaliyyəti, kollektivin harada çalışacağı və təmir olunmuş binanın həqiqətən Pediatriya Mərkəzinə veriləcəyi ilə bağlı rəsmi açıqlama verilməsini xahiş ediblər.

Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, hazırda mərkəzin yerləşdirilməsi ilə bağlı hər hansı yekun qərar qəbul edilməyib.

"TƏBİB tərəfindən tibb müəssisələrinin infrastrukturunun təkmilləşdirilməsi, resursların səmərəli idarə olunması və tibbi xidmətlərin əlçatanlığının artırılması məqsədilə mütəmadi olaraq müxtəlif təşkilati tədbirlər həyata keçirilir.

Bu proses çərçivəsində tibb müəssisələrinin fəaliyyətinin optimallaşdırılması, ayrı-ayrı xidmətlərin daha səmərəli təşkili və səhiyyə sisteminin mövcud ehtiyaclarına uyğun inkişaf istiqamətləri qiymətləndirilir. Bu istiqamətlərdən biri də uşaqlara göstərilən ixtisaslaşmış tibbi xidmətlərin beynəlxalq təcrübəyə uyğun müasir multidisiplinar model əsasında inkişaf etdirilməsidir. Bu məqsədlə ixtisaslaşdırılmış multidisiplinar mərkəzin yaradılması istiqamətində müxtəlif təşkilati həllər nəzərdən keçirilir. Nərimanov Tibb Mərkəzi ilə bağlı səsləndirilən məsələlər də bu ümumi proses çərçivəsində dəyərləndirilir. Hazırda mərkəzin yerləşdirilməsi ilə bağlı hər hansı yekun qərar qəbul edilməyib.

Gələcəkdə bu istiqamətdə hər hansı qərar qəbul ediləcəyi təqdirdə, Nərimanov Tibb Mərkəzinin əməkdaşlarının peşəkar fəaliyyətinin fasiləsiz davam etdirilməsi üçün müvafiq iş şəraiti yaradılacaq. Qəbul ediləcək qərarlar barədə əməkdaşlar aidiyyəti qaydada məlumatlandırılacaqlar", - deyə məlumatda bildirilib.