Novella Cəfəroğlu: “İlham Əliyevə alternativ yoxdur, hazırkı vəziyyətdə Prezidentin dəyişməsini istəmirəm”

“Prezident seçkiləri indi olmalıdır, çünki Rusiyadan öncə seçkilərə getməliyik. Bilmək olmaz, Rusiyada kim prezident seçiləcək, vəziyyət necə olacaq... Azərbaycanın stabilliyini qoruyub-saxlamaq üçün, o cümlədən islahatlar aparmaq baxımından seçkilər lazım idi. Cənab Prezident xarici siyasətimizi dünya səviyyəsində çox gözəl göstərdi. Hamımız görürük ki, Azərbaycan necə normal vəziyyətə gəlib, xarici siyasətini düzgün aparır, hamı Azərbaycanın ayağına gəlir. Bir sözlə, artıq xarici siyasətlə bağlı işlərimizi görmüşük. İndi isə növbə daxili siyasəti nümayiş etdirməkdədir. İslahatlar aparmaq, korrupsiya ilə mübarizənin gücləndirilməsi, azad etdiyimiz torpaqlarımızda normal şəraitin bərpası, ən əsası Zəngəzur məsələsinin həlli - bütün bunların hamısı Azərbaycanın stabilliyindən asılıdır. Azərbaycanın gələcəyi üçün növbədənkənar prezident seçkiləri keçirilir.  Müxalifət istəsə, seçkilərə qatıla bilər. Sən həmişə seçkilərə hazır olmalısan! Ard-arda bələdiyyə, parlament, prezident seçkiləri gəlir. Buna görə müxalifət seçkilərə hazır olmalı idi. Dünya dəyişir, baxın, dünyada vəziyyət nə gündədir, hər yerdə konfliktlər, dəyişikliklər olur. Bu baxımdan, müxalifət seçkilərə getməlidir. Hesab edirəm, seçkilər demokratik keçəcək”.

Ens.az-ın məlumatına əsasən,bu sözləri Pravda.az-a açıqlamasında hüquq müdafiəçisi Novella Cəfəroğlu deyib.

 O, üzvü olduğu Müsavat Partiyasında növbədənkənar prezident seçkiləri ilə bağlı məsələhətləşmələr aparılıb-aparılmadığı barədə suala belə cavab verib: “Məsələhtləşmələr olub. Sonda Məclis həll edəcək ki, Partiya seçkilərə getsin, ya yox. Mən istəyərdim ki, getsin. Nə olur-olsun, seçkidən kənarda qalmaq olmaz. Doğrudur, tezdir, iki aya hazırlaşmaq çox çətindir. Amma seçkiyə getmək lazımdır”.

 N.Cəfəroğlu “siyasi arenada Prezident İlham Əliyevə alternativ varmı?” sualını isə belə cavablandırıb: “Sözsüz ki, bu gün İlham Əliyevə alternativ yoxdur. Amma müxalifət də göstərsin ki, alternativ tapa bilər. Bütün müxalifət partiyaları hamısı toplaşıb ümumi bir nəfər namizəd irəli sürə, birlikdə mübarizə apara bilərlər. Sözün düzü, hazırkı vəziyyətdə Prezidentin dəyişməsini istəmirəm, çünki Azərbaycanı belə gözəl bilən, bu cür keşiyində duran İlham Əliyevdir. Bilirəm ki, korrupsiya ilə mübarizə aparacaq, bəzi nazirləri dəyişəcək. Bunların hamısını İlham Əliyev edə bilər. Dünyaya göstərsin ki, xarici siyasətlə yanaşı daxildə də demokratik dəyişikliklər edəcəyəm”.