“Ölkəni qeyri-qanuni tərk edən kişilər dövlətə kömək etməlidirlər”

“Qeyri-qanuni olaraq xaricə gedən səfərbərlik yaşında olan ukraynalı kişilər geri qayıtmalı və dövlətə kömək etməlidirlər”.

Ens.az Yeniavaz.com-a istinadən xəbər verir ki,bunu Ukrayna Prezidenti Volodimir Zelenski Tallinndə Estoniyanın Baş naziri Kaja Kallas ilə keçirdiyi mətbuat konfransında deyib.

Zelenskiyə “Estoniya hərbi yaşda olan ukraynalıları səfərbərlik üçün Ukraynaya göndərməlidirmi?” sualı verilib.

Buna cavab olaraq prezident qeyd edib ki, Rusiyanın genişmiqyaslı işğalının əvvəlində müxtəlif cinsdən və yaşdan olan sakinlər Ukraynanı tərk ediblər:

“Ölkə hakimiyyəti buna qarışmayıb, çünki ondan sonra nə olacağını heç kim bilmirdi. Lakin vəziyyət dəyişib, ona görə də səfərbərlik yaşında olan ukraynalılar, xüsusən də ölkəni qeyri-qanuni tərk edənlər geri qayıtmalıdırlar.

Mən demirəm ki, kimsə cəbhədə vuruşsun. Qanun var. Amma ümumi insan qaydası var: bir hərbçiyə 6-8 vergi ödəyicisi düşür.

Əgər siz Ukraynadasınızsa və cəbhədə deyilsinizsə, amma işləyirsinizsə - harada işləməyinizdən asılı olmayaraq - işləyib vergi ödəyirsənsə, deməli dövləti də qoruyursunuz. Və bu çox zəruridir. Amma əgər xaricdəsinizsə və səfərbərlik yaşındasınızsa, cəbhədə deyilsinizsə, vergi ödəmirsinizsə, qanundan kənar səyahət etmisinizsə, onda suallar yaranır. Vəssalam”.

Zelenski əlavə edib ki, vergi ödəmək vacibdir, çünki əks halda hərbiyə pul olmayacaq:

“Pul olmasa, hərbçi olmayacaq, Ukraynanı müdafiə edəcək adam olmayacaq. Bunlar həyatın qaydalarıdır”.