OpenAI Apple-ı ticarət sirləri iddiasında “aqressiv və qeyri-adi şəxsi yanaşmada” ittiham edib

OpenAI şirkəti Apple-ın ona qarşı qaldırdığı ticarət sirləri ilə bağlı məhkəmə iddiasını sərt tənqid edərək, bunun "əsassız, aqressiv və qəribə şəkildə şəxsi xarakter daşıyan" iddia olduğunu bəyan edib.

Şirkət rəsmi bloqunda yayımladığı açıqlamada Apple-ın ittihamlarını rədd edərək, "Bizdə Apple-ın ticarət sirləri yoxdur və onlara ehtiyacımız da yoxdur" ifadəsinə yer verib.

Məhkəmə çəkişməsi hər iki şirkətin fəaliyyət sahələrinin getdikcə daha çox üst-üstə düşdüyü bir vaxta təsadüf edir. OpenAI istehlakçı məhsulları bazarına daxil olmağa çalışdığı halda, Apple Google ilə əməkdaşlıq edərək Siri səs köməkçisini süni intellekt texnologiyaları əsasında yeniləyir.

Qeyd edək ki, OpenAI və Apple əvvəllər Apple məhsullarına süni intellekt funksiyalarının inteqrasiyası istiqamətində əməkdaşlıq ediblər. Lakin münasibətlər ötən il OpenAI-nin Apple-ın sabiq baş dizayneri Coni Ayv tərəfindən yaradılmış io dizayn studiyasını satın almasından və Apple-ın bir sıra keçmiş əməkdaşlarını işə götürməsindən sonra gərginləşib.

Apple iddia edir ki, hazırda OpenAI-də şirkətin 400-dən çox keçmiş əməkdaşı çalışır. Məhkəmə sənədlərində bildirilir ki, Apple bu ilin fevralında OpenAI ilə əlaqə saxlayaraq daxili araşdırma barədə xəbərdarlıq etsə də, şirkətdən cavab ala bilməyib. Buna cavab olaraq OpenAI bildirib ki, Apple-ın hüquqşünasları elektron məktubu soyadları oxşar olan iki asiyalı şəxsi səhv salaraq yanlış ünvana göndəriblər. Şirkətin sözlərinə görə, Apple həmçinin OpenAI-nin baş hüquq müşaviri ilə görüş keçirildiyini iddia etsə də, sonradan belə bir görüşün baş vermədiyini etiraf edib.

OpenAI qeyd edib ki, Apple həmin vaxt hazırkı məhkəmə iddiasında yer alan konkret ittihamları irəli sürməyib, əksinə, yaranmış məsələlərin həll olunduğunu bildirib. Bundan sonra isə beş ay ərzində heç bir əlaqə saxlamayıb və yalnız daha sonra məhkəməyə müraciət edib.

Apple iddiasında şirkətin ən məxfi məhsul inkişaf proqramlarında çalışmış keçmiş əməkdaşı Çanq Liunun işdən ayrıldıqdan sonra məxfi məlumatlara çıxış əldə etdiyini irəli sürür.

OpenAI isə bunun əksini bildirərək qeyd edib ki, məhz Apple əməkdaşları Liu ilə əlaqə saxlayaraq həmin məlumatların tapılmasına kömək göstərməsini istəyiblər və şirkət bunu yalnız indi etiraf edir.

Məhkəmə iddiasında adı çəkilən digər şəxs OpenAI-nin aparat təminatı üzrə baş direktoru Tanq Tandır. Apple onu iş müsahibələri zamanı şirkətin məxfi məlumatlarını əldə etməyə çalışmaqda ittiham edir.

OpenAI isə bildirib ki, Tanq Tan komandaya hər zaman digər şirkətlərə məxsus məxfi məlumatların əldə edilməsinin və istifadəsinin yolverilməz olduğunu açıq şəkildə bildirib.

Apple ABŞ məhkəməsinə təqdim etdiyi vəsatətdə keçmiş əməkdaşlarının və OpenAI-nin şirkətin ticarət sirlərinə çıxışının, onlardan istifadəsinin və ya açıqlanmasının müvəqqəti qadağan edilməsini istəyib. Bundan başqa, şirkət məhkəmədən iş üzrə sübutların toplanması prosesinin sürətləndirilməsini və OpenAI-nin bir neçə əməkdaşının, o cümlədən Çanq Liu və Tanq Tanın ifadə verməsini tələb edib.

OpenAI isə Apple-ın müvəqqəti məhkəmə qadağası tələbinin həm yanlış məlumatlara əsaslandığını, həm də tamamilə əsassız olduğunu vurğulayıb.

Şirkət açıqlamasında bildirib: "Apple dünyanın ən böyük şirkətlərindən biridir və ən xırda detallara belə diqqət yetirməsi ilə tanınır. Təəssüf ki, bu əsassız, aqressiv və qəribə şəkildə şəxsi xarakter daşıyan iddia həmin nüfuza uyğun gəlmir."

Apple isə hələlik OpenAI-nin son açıqlamasına münasibət bildirməyib.

mənbə: arstechnica.com