Özbəkistanda İbad Hüseynli ilə görüş keçirilib

Özbəkistanın paytaxtı Daşkənddə və Səmərqənd şəhərində “Azərbaycan bayrağı” ordenli İbad Hüseynli ilə görüş keçirilib.

AZƏRTAC xəbər verir ki, Daşkənddə fəaliyyət göstərən Heydər Əliyev adına Azərbaycan Mədəniyyət Mərkəzində reallaşan görüşdə mərkəzin rəhbəri Samir Abbasov qəhrəmanımızın keçdiyi döyüş yolundan, belə xalq qəhrəmanlarının yeniyetmə və gənclər tərəfindən tanınmasının önəmindən danışıb.

Bildirilib ki, 1994-cü ildə ulu öndər Heydər Əliyevin müvafiq Fərmanı ilə İbad Hüseynli Azərbaycan torpaqlarının müdafiəsində qəhrəmanlıq göstərdiyinə görə “Azərbaycan bayrağı” ordeni ilə təltif olunub.

Samir Abbasov ölkə rəhbərliyinin siyasəti, Azərbaycan xalqının mübarizliyi nəticəsində Vətən torpaqlarının işğaldan azad olunacağını qeyd edib, ölkəmizdə qəhrəmanlara, şəhid ailələrinə daim diqqət və hörmətlə yanaşıldığını vurğulayıb.

Ona göstərilən diqqət və hörmətə görə təşəkkürünü bildirən İbad Hüseynli keçdiyi şərəfli yol haqqında danışıb, Vətən torpaqlarının azadlığı və bütövlüyü üçün hər bir vətəndaşın mübarizə aparmasının vacib olduğunu deyib. O, xalqımızın apardığı mübarizənin haqq işi olduğunu və gələcək nəsillərdə milli vətənpərvərlik hisslərinin gücləndirilməsinin vacibliyini bildirib.

Sonra Azərbaycan Mədəniyyət Mərkəzində İbad Hüseynlinin Mədəniyyət Mərkəzinə hədiyyə etdiyi kitablara baxış keçirilib. İştirakçılar “Xüsusi Təyinatlı”, “O bir qəhrəman”, “Yaşayan Şəhid”, “Qurd balası”, “Qorxunu öldürən qəhrəman” və başqa nəşrlərlə yaxından tanış olublar.

Qulu Kəngərli

AZƏRTAC-ın xüsusi müxbiri

Daşkənd