Pensiyaçıların sayında diqqətçəkən dəyişiklik: Qadınlar azalır, kişilər artır

Azərbaycanda pensiya alan qadınların sayı kişilərdən çox olsa da, son bir ildə aradakı fərq əhəmiyyətli dərəcədə azalıb. 2026-cı ilin əvvəlinə ölkədə 611 min qadın və 488 min kişi pensiyaçı qeydə alınıb. Beləliklə, qadın pensiyaçıların sayı kişilərdən 123 min nəfər çox olub.

Ens.Az rəsmi statistikaya istinadən xəbər verir ki, ölkədə pensiyaçıların ümumi sayı 1 milyon 99 min nəfər təşkil edib. Onların 55.6 faizi qadınların, 44.4 faizi isə kişilərin payına düşüb.

2025-ci ilin əvvəli ilə müqayisədə qadın pensiyaçıların sayı 639 min nəfərdən 611 min nəfərə düşüb. Bu, 28 min nəfər və ya 4.4 faiz azalma deməkdir.

Kişi pensiyaçıların sayı isə əksinə, 459 min nəfərdən 488 min nəfərə yüksəlib. Beləliklə, bir il ərzində onların sayı 29 min nəfər və ya 6.3 faiz artıb.

Nəticədə qadınlarla kişi pensiyaçılar arasındakı say fərqi 2025-ci ilin əvvəlindəki 180 min nəfərdən 2026-cı ilin əvvəlində 123 min nəfərə enib. Bir il ərzində fərq 57 min nəfər və ya 31.7 faiz azalıb.

Uzunmüddətli statistikada da qadın pensiyaçıların sayının azalması diqqət çəkir. 2011-ci ilin əvvəlində Azərbaycanda 784 min qadın pensiyaçı olduğu halda, 2026-cı ilin əvvəlində onların sayı 611 min nəfərə düşüb. Bu, 173 min nəfər və ya 22.1 faiz azalma deməkdir.

Eyni dövrdə kişi pensiyaçıların sayı 508 min nəfərdən 488 min nəfərə enib. Onların sayında azalma 20 min nəfər və ya 3.9 faiz təşkil edib.

Beləliklə, son 15 ildə pensiyaçıların ümumi sayı 1 milyon 292 min nəfərdən 1 milyon 99 min nəfərə düşüb. Azalma 193 min nəfər və ya 14.9 faiz olub.

Bu müddətdə qadınların pensiyaçılar arasındakı payı 60.7 faizdən 55.6 faizə enib. Kişilərin payı isə 39.3 faizdən 44.4 faizə yüksəlib.

2026-cı ilin əvvəlinə olan göstəriciyə əsasən, ilk dəfə pensiya təyin olunmuş şəxslərin sayı 53 548 nəfər olub. Onların 29 773 nəfəri qadın, 23 775 nəfəri isə kişidir.

Əvvəlki ilin müvafiq göstəricisi ilə müqayisədə ilk dəfə pensiya təyin olunan qadınların sayı 1 609 nəfər azalıb, kişilərin sayı isə 1 236 nəfər artıb.

Qeyd edək ki, 2026-cı ilin əvvəlinə Azərbaycanda pensiyaçıların 13,8 faizi əmək fəaliyyətini davam etdirib.

Abbas Mirzəyev