Putindən maraqlı təyinat: Lavrovun müavinini Türkiyəyə səfir göndərdi

Rusiya Prezidenti Vladimir Putin Sergey Verşinini xarici işlər nazirinin müavini vəzifəsindən çıxarıb və Türkiyəyə səfir təyin edib.

Bu barədə Oxu.Az TASS-a istinadən xəbər verir.

24 iyul 1954-cü ildə anadan olan Sergey Vasilyeviç Verşinin 1976-cı ildən diplomatik fəaliyyətə başlayıb, bir çox ölkələrdəki səfirliklərdə müxtəlif vəzifələr tutub.

2011-ci ildən etibarən eyni vaxtda Rusiya xarici işlər nazirinin Yaxın Şərq nizamlanması üzrə xüsusi nümayəndəsi olub.

Brüssel "dörd"lüyünün (Avropa İttifaqı, BMT, ABŞ və Rusiya Federasiyası) Fələstin-İsrail münaqişəsi üzrə danışıqlarında Rusiyanı təmsil edib. 2013-cü ildən Suriyada nizamlanma üzrə beynəlxalq məsləhətləşmələrdə iştirak edib.

Habelə İsveçrənin Cenevrə şəhərində Suriya müxalifəti ilə görüşlərdə və Avstriyanın Vyana şəhərində Suriya üzrə danışıqlarda iştirak edib.

27 mart 2018-ci ildən Rusiya xarici işlər naziri Sergey Lavrovun müavini vəzifəsində çalışıb.

2007-ci ildən "fövqəladə və səlahiyyətli səfir" diplomatik rütbəsinə malikdir.

Ərəb, fransız və ingilis dillərini bilir.