Sabir Rüstəmxanlı Mehdiyevin nəvəsinin toyundan danışdı - “Bağışlanılmazdır!“

Azərbaycan Respublikasında əhalinin sağlamlığının qorunması və təhlükəsizliyinin təmin edilməsi məqsədilə bir çox məhdudiyyətləri nəzərdə tutan xüsusi karantin rejimi tətbiq olunub. Nazirlər Kabineti yanında Operativ Qərargah yoluxma və sağalma hallarında müsbət dinamikanı nəzərə alaraq avqustun 10-dan yumşaldıcı tətbirlərin tətbiq edilməsi barədə qərar qəbul edib. Koronavirusla mübarizəyə ciddi təhdid yaratdığına görə, kütləvi tədbirlərin, o cümlədən yas və toy mərasimlərinin keçirilməsinə qadağa qüvvədə saxlanılıb.

Azərbaycan hüquqi dövlətdir, ölkəmizdə qanunun aliliyi təmin edilib, heç kim qanundan üstün ola bilməz, hamı qanun qarşısında bərabərdir və öz hərəkətlərinə görə məsuliyyət daşıyır. Indiyədək daxili işlər orqanları xüsusi karantin rejiminin tələblərini pozaraq əyləncə təşkil edən, toy, yas və s. mərasimləri keçirən çoxlu sayda şəxsi məsuliyyətə cəlb edib.

Bu günlərdə bəzi vəzifəli şəxslərin, məmurların müxtəlif toy mərasimləri təşkil etməsinə dair məlumatlar cəmiyyətin ciddi hiddətinə səbəb olub və qınağına məruz qalıb. Hər bir şəxs mövcud reallığı, qanunların aliliyini, Azərbaycan Prezidentinin mövqeyini və ali iradəsini bilməlidir.

Başa düşülməlidir ki, hər kəs qanun pozuntusuna görə mütləq cavab verəcək. Koronavirusla mübarizə ümummilli məsələdir, heç kim  şəxsi mənafeyi naminə, tutduğu mövqeyə, vəzifəsinə görə insanların həyatını təhlüfəyə ata və onların sağlamlığına zərər gətirə bilməz. Bu reallığı hamı, həmçinin bəzi akademiklər də bilməli və başa düşməlidirlər ki, baş verənlərə görə mənəvi məsuliyyət daşıyırlar. 

Ens.az xəbər verir ki,müzakirə olunmaqda davam edən toyla bağlı “Sherg.az”a fikrini bildirən millət vəkili, Vətəndaş Həmrəyliyi Partiyasının sədri Sabir Rüstəmxanlı qanunun hər kəs üçün şah olduğunu deyib:

“Kimliyindən asılı olmayaraq hər kəs qanuna əməl etməli və real şəraitə uyğun davranmalıdır. Karantinin nə vaxtadək davam edəcəyi, bəlkə də, bitmə vaxtının çoxdan çatdığı və  sair kimi iddialar başqa məsələdir. Əsas odur ki, karantin davam edir və bu, hamıya aiddir. Qanundan danışanların qanunu tanımaması yolverilməzdir”. 

S.Rüstəmxanlının fikrincə, gənclər qanunu pozmadan da arzularına çata bilərdilər: 

“Tanıdığım 4-5 cütlük var ki, toy üçün dəfələrlə şadlıq sarayına müraciət etsələr də, karantin qaydaları buna mane olub. Bəziləri sadə nikah bağlayır. Hətta ənənəvi üsuldan istifadə edərək, qız qaçıranlar da var.

Əlbəttə, bunlar müəyyən mənada anlaşılandır. Amma indiki məqamda belə bir təşəbbüs bağışlanılmazdır”.