Şolz heç vaxt Ukraynaya “Taurus” raketlərini verməyəcəyini təsdiqləyib

Almaniya kansleri Olaf Şolz Almaniyanın “Taurus” qanadlı raketlərini Ukraynaya ötürməkdə qəti istəksiz olduğunu təsdiqləyib.

Ens.az Bizimyol.info-a istinadən xəbər verir ki,o, bu barədə çərşənbə günü, martın 13-də Bundestaqda parlament müzakirələri zamanı müvafiq bəyanatla çıxış edib.

“Euractiv” xəbər verir ki, Şolz Ukrayna Silahlı Qüvvələrinin alman əsgərlərinin iştirakı olmadan “Taurus” raketlərindən istifadə edə bilməyəcəyi barədə əvvəllər səsləndirdiyi tezisini təkrarlayıb. Bunu isə öz növbəsində Almaniya hökuməti üçün qəbuledilməz hesab etdiyini deyib: “Bu, kansler kimi keçmək istəmədiyim qırmızı xəttdir”, - deyə əlavə edib ki, onun "ehtiyatlılığı zəiflik kimi təsnif edilməməlidir".

Əvvəllər Şolz Rusiyadakı hədəflərə əsassız hücumların qarşısını almaq üçün alman əsgərlərinin cəlb edilməsinin zəruri olduğunu müdafiə edib. Eyni zamanda o, Ukraynanın raketlərdən istifadəsində alman əsgərlərinin belə iştirakının Almaniyanı münaqişənin bir hissəsi edəcəyinə eyham vurub.

Almaniya Bundestaqının müdafiə komitəsinin aparıcı üzvü Aleksandr Müller jurnalistlərə bildirib ki, Şolzun bu vəziyyətə tərəfdar olmasının səbəbləri barədə komitəyə məlumat verilib: “İctimaiyyətdə müzakirə oluna bilməyən bəzi məsələlər var ki, onu haqlı olaraq tərəddüd etməyə vadar edir”, - deyə Müller bildirib.

Şolz özü də parlamentdə bu gün keçirilən dinləmələrdə müxalifəti raket məsələsindən daxili siyasi mübarizədə alət kimi istifadə etməkdə ittiham edib. Onun sözlərinə görə, indiki hakimiyyətin siyasi opponentləri, görünür, bu gizli səbəbləri yaxşı bilirlər, lakin onların ictimaiyyətə məlum olmamasından istifadə edirlər.

Ukrayna mətbuatı yazır ki, oxşar xüsusiyyətlərə malik raketlərin artıq Böyük Britaniya və Fransa tərəfindən Ukraynaya tədarük edilməsinə baxmayaraq, Almaniya hökuməti “Taurus” qanadlı raketlərini Ukraynaya verməkdən qəti şəkildə imtina edir. Bu yaxınlarda Britaniya hökuməti Almaniyaya dairəvi mübadilə etməyi təklif edib: Berlin öz raketlərini Londona verəcək, onlar Britaniyada qalacaqlar, ingilislər isə öz raketlərindən daha çoxunu Ukraynaya verə biləcəklər.

Almaniyanın xarici işlər naziri Annalena Burbok Britaniyanın təşəbbüsünü dəstəkləyərək, oxşar dairəvi mübadilə sxemlərinin əvvəllər də istifadə olunduğunu xatırladıb.

Lakin alman müxalifəti bu fikrə qarşı çıxıb. Onlar hesab edirlər ki, “Taurus” birbaşa Ukraynaya verilməlidir, çünki onlar Britaniya raketlərindən daha yaxşı xüsusiyyətlərə malikdirlər.