Tramp arzusunda olduğu Nobel Sülh Mükafatını bu il ala biləcəkmi? - ABŞ lideri şanslarını dəyərləndirdi

İranla müharibəyə başlayan və Ukraynada sülhə nail ola bilməyən ABŞ Prezidenti Donald Tramp Nobel Sülh Mükafatına layiq olduğunu bəyan edib, lakin şanslarının az olduğunu bildirib.

Oxu.Az-ın xəbərinə görə, bu barədə "Reuters" agentliyi məlumat verib.

Tramp vurğulayıb ki, komitənin qərarının nə olacağını bilmir. O ehtimal edib ki, mükafat onun kimi insanlara verilmir.

"Məhz o vaxt (Nobel Sülh Mükafatını almağın vaxtı) gəlib çatıb. Lakin keçən dəfə onu tarixdə heç kimin Prezident Trampdan daha çox buna layiq olmadığını deyən laureatdan dolayı yolla almaq mənim üçün böyük şərəf idi", - deyə ABŞ Prezidenti qeyd edib.

Xatırladaq ki, keçən il oktyabrın 10-da Nobel Komitəsi mükafatı Venesuela müxalifət lideri Mariya Korina Maçadoya "Venesuela xalqının demokratik hüquqlarının müdafiə edilməsində yorulmaz işinə və diktaturadan demokratiyaya ədalətli və dinc keçidə nail olmaq üzrə mübarizəsinə" görə vermişdi.

Mükafata namizədlərdən biri də Donald Tramp idi, lakin bukmeykerlər onun şansını 3% olaraq qiymətləndirirdilər. Siyasətçi Ağ Evə qayıtdıqdan sonra dəfələrlə mükafatı qazanmaq istəyindən danışmış və buna görə də sülhməramlı kimi görünmək üçün səylər göstərmişdi.