Tramp: "Avropa ölkələri Ukraynaya ABŞ-la bərabər əsasda yardım üçün vəsait ayırmalıdır"

"Avropa ölkələri Ukraynaya kömək üçün ABŞ qədər pul ayırmalıdırlar, əks halda bu, amerikalı vergi ödəyicilərinə qarşı ədalətsizlikdir".

Ens.az Bizimyol.info-a istinadən xəbər verir ki, bu fikirləri ABŞ-ın keçmiş prezidenti Donald Tramp deyib.

“Avropa Ukraynaya bizdən təxminən 100 milyard dollar az xərcləyir. Hesab edirəm ki, bu, Amerikaya qarşı çox ədalətsizlikdir. Bu, ABŞ-ın vergi ödəyicilərinə qarşı böyük ədalətsizlikdir”, - deyə Tramp bu barədə çərşənbə günü "Newsmax"a müsahibəsində bildirib. O, jurnalistin prezident seçkilərində qalib gələcəyi təqdirdə Kiyevə ayrılan vəsaiti azaldıb-azalmayacağı ilə bağlı sualını belə şərh edib.

“Avropa ölkələri ABŞ-la birlikdə eyni məbləği ödəməlidir”, - deyən keçmiş prezident əlavə olaraq qeyd edib ki, Ukraynadakı vəziyyət Avropanın təhlükəsizliyi üçün daha böyük əhəmiyyət kəsb edir: “Ona görə də, bu ölkələr bilməlidirlər ki, bütün xərcləri ABŞ-ın üzərinə atıb kənara çəkilməklə özlərini təhlükədən xilas olmuş hesab etməməlidirlər”, - deyə Tramp bildirib.

Bundan əvvəl martın 8-də Floridadakı malikanəsində Trampla görüşən Macarıstanın baş naziri Viktor Orban bildirib ki, ABŞ-ın keçmiş prezidenti Ağ Evə qayıdarsa, Ukraynadakı hərbi əməliyyatları maliyyələşdirməyəcək və Avropanın təhlükəsizliyinə vəsait ayırmayacaq.