Tramp öz müşaviri barəsində təhqiqat başlatdı - Ağ Evdə skandal

ABŞ Prezidenti Donald Tramp nüfuz alveri (təsir imkanlarını satmaq) şübhələri ilə bağlı öz müşaviri Riçard Qrenellə qarşı yoxlama aparılması barədə göstəriş verib.

“Qafqazinfo” “Axios” portalına istinadən xəbər verir ki, təhqiqatı Ağ Evin hüquq məsləhətçisi aparatı həyata keçirir.

Nəşr yazır ki, yoxlamanın başlamasına Trampın keçmiş vəkili Alina Habbadan daxil olan məlumatlar səbəb olub. Habba Qrenell tərəfindən şübhəli təkliflərin irəli sürüldüyünü iddia edib:

“İttihamların mahiyyəti ondan ibarətdir ki, 2025-ci ilin may ayında Qrenell türkiyəli iş adamı Turhan Mildona Con Kennedi Mərkəzinə ianə etmək müqabilində ABŞ administrasiyasına çıxış və Trampla görüşlər təşkil etməyi təklif edib. Qrenell tərəfindən göndərilən mətn mesajı işdə əsas sübut hesab olunur. Habba və Mildonun vəkillərinin versiyasına görə, vəsaitlər köçürülsə də, mədəniyyət mərkəzi həmin pulları almayıb. Riçard Qrenell özü isə bütün ittihamları qətiyyətlə rədd edərək, sahibkardan heç bir pul almadığını bildirir”.

Qeyd edək ki, zəngin siyasi təcrübəyə malik olan Qrenell daha əvvəl ABŞ-nin Almaniyadakı səfiri və Milli Kəşfiyyatın icraedici direktoru vəzifələrində çalışıb, 2025-2026-cı illərdə isə Kennedi Mərkəzinə rəhbərlik edib.

Məlumat üçün bildirək ki, bundan əvvəl ABŞ-də demokratların Nümayəndələr Palatasına seçkilərdə qələbə qazanacaqları təqdirdə Ağ Ev rəhbəri Donald Trampa qarşı miqyaslı təhqiqatlar planı hazırladıqları barədə məlumat verilmişdi.