Abdulla Padarlı - Görmədim

Abdulla Padarlı - Görmədim qoşması

Va həsrəta, çərxi-fələk əlindən,
Çünki dostu-mehribanı görmədim. 
Camali-kamalın dildən eşitdim,
Nə fayıda zənəxdanı görmədim.

Neçə müddət könül intizar idi.
Fikrim, zikrim xəyalımda yar idi, 
Dedilər ki, yaxşı dövran var idi,
Mən çox gəzdim o dövranı görmədim.

Devreyi-ruyunu almış təravət, 
Yandırdı ciyərim nari-fəraqət,
Əzrayıl tək gəldi ruzi-qiyamət,
Getdim sidri-müntəhanı görmədim.

Səndən ayrı ahü-fəğan edirdim,
Bu sirrimi xalqa nəhan edirdim,
Könül məclisində seyran edirdim, 
Baxdım şəmi-şəbistanı görmədim.

Abdullayam, baş açmadım bu sirdən,
Fələk üz döndərdi mən tək fəqirdən, 
Möcüzləri xəbər aldım səfirdən,
Cavab verdi: “Məsihanı görmədim”.