Dağ kəndlərində qaz və işıq limitləri ləğv olunsun - Təklif

"Dağlıq rayonlarda yaşayışa təsir edən ən mühüm məsələ kommunal tariflərdir".

Ens.az Oxu.az-a istinadən xəbər verir ki, bu fikirləri Milli Məclisin İnsan Hüquqları komitəsinin sədri Zahid Oruc Parlamentin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları və Regional məsələlər komitələrinin iclasında deyib.

O bildirib ki, Bakı və Abşerondakı hava şəraiti Gədəbəyin, Daşkəsənin, Lerikin, Şahbuzun və Qusarın yüksək dağ kəndlərindəki iqlimdən fərqlidir:

"Elə yaşayış məntəqələri var ki, ailələr yeddi-səkkiz ay evlərini qızdırmalı olur. Ancaq ölkə üzrə eyni istehlak tarifləri və limitlər tətbiq edilir. Qaz və elektrik təchizatında aylıq sabit ödənişlər də mövcuddur. Eyni istehlak şərtlərini müxtəlif iqlim şəraitində yaşayan ailələr üçün tətbiq etmək ağır nəticələr doğurur.

Biz bütün ölkədə kommunal tariflərin birdən dəyişdirilməsindən danışmırıq. Söhbət sərt iqlim şəraitində yaşayan, xüsusilə sərhəd və yüksək dağ kəndlərində məskunlaşan ailələr üçün fərqli yanaşmadan gedir".

Onun sözlərinə görə, belə ərazilərdə qaz və elektrik üzrə istehlak limitlərinin ləğvi, ödənişlərdə isə güzəştli tariflərin tətbiqi təklif edilir:

"Həmin kəndlərdə çalışan həkim və müəllimlər üçün də iqlim və məsafə nəzərə alınmaqla əlavə ödəniş əmsalları müəyyənləşdirilə bilər. Sərhəd və dağ kəndlərində məskunlaşmanın gücləndirilməsi üzrə dövlət proqramının qəbulu ölkə başçısının narahatlıqla vurğuladığı paytaxta axının qarşısının alınmasında mühüm rol oynaya bilər".