"Əhalini mütləq şəkildə bütün tələblərə riayət etməyə çağırıram"-Deputat

Bununla SONXEBER.AZ-a danışan deputat Ramin Məmmədov bildirib ki, koronavirusdan bir çox ölkə əziyyət çəkir. Azərbaycanda ilk gündən bu məsələyə çox ciddi münasibət sərgilənərək qabaqlayıcı tədbirlərin həyata keçirilməsi təmin edilib. Müxtəlif səpkili addımların bir ali məqsədi var - əhalini bu qlobal virusa yoluxmadan qorumaq və yaranmış vəziyyətdən minimum ziyanla çıxmaq. Qəbul olunmuş qərarlar, profil üzrə işçi qrupların fəaliyyətə başlaması, Koronavirusla mübarizəyə Dəstək Fondunun formalaşması və s ümumilikdə mövcud vəziyyətə dövlətin adekvat və ciddi yanaşmasını sərgiləyirlər. Eyni zamanda cəmiyyətin bütün üzvlərinin müvafiq münasibəti sərgiləməsi, ciddiliklə məsələyə yanaşması problemin tez bir zamanda aradan qalxmasına güclü dəstək vermiş olar. Virusa qarşı mübarizədə bütün cəmiyyət səfərbər olmalıdır. Təəssüf ki, əhalinin bu təhlükəli virusu tam ciddi qəbul etməməsi, karantin rejiminin tələblərinə riayət etməməsi son günlər yoluxma hallarının artmasına, daha geniş coğrafiyanı əhatə etməsinə gətirib çıxardıb. Nəticə kimi artıq 150-ə qədər yoluxma halı qeydə alınıb. Dövlətimiz 29 mart tarixindən etibarən əhalinin maraqlarını, təhlükəsizliyini təmin etmək üçün karantin rejimin tələblərini sərtləşdirməyə qərar verib. Bu da öz nöbvəsində koronavirusla mübarizədə atılan ciddi addımlar silsiləsindəndir. Əhalini mütləq şəkildə bütün tələblərə riayət etməyə çağırıram, dövlətimizin apardığı böyük işlərə dəstək olmağa səsləyirəm. Eyni zamanda cəmiyyət arasında yanlış məlumatlar yaymaqla ictimayi çaşqınlığa səbəb ola biləcək addımlardan uzaq durmağa təkidlə dəvət edirəm".

Aysel Yusifqızı