“Ermənistanın girovluğundakı azərbaycanlıların hər günü işgəncələrlə keçir” - Nüşabə Məmmədova

Azərbaycan Milli QHT Forumunun vitse-prezidenti, Beynəlxalq Dialoq və İnkişaf Alyansının sədri Nüşabə Məmmədova avqustun 23-də Goranboy rayonu istiqamətində Ermənistan silahlı qüvvələrinin növbəti təxribatının qarşısının alınması zamanı döyüşlərdə erməni diversiya qrupunun komandiri, baş leytenant Qurgen Alaverdyanın əsir götürülməsi olayına münasibət bildirib.

Ens.az xəbər verir ki, O,KONKRET.az–a  açıqlamasında xatırladıb ki, erməni diversiya qrupunun Azərbaycan torpağında təxribat törətməsi cəhdi ilk dəfə deyil:

“2014-cü ilin avqust ayında Karen Petrosyan, həmin ilin dekabrında Arsen Baqdasaryan, 2018-ci ilin iyulunda Qazaryan Karen adlı erməni diversantları qoşunların təmas xəttini keçərək təxribat törətməyə cəhd göstərdikləri zaman əsir götürülüb”.

QHT sədri vurğulayıb ki, hazırda Ermənistan mediasında Qurgen Alaverdyanın dəyişdirilməsi ilə bağlı müxtəlif təkliflər səslənib:

“Bu vaxta qədər Ermənistan tərəfi əsir və girovların dəyişdirilməsinə bağlı mövqeyi dəyişilməz idi. Lakin ilk dəfədir ki, əsirin dəyişdirilməsi ilə bağlı fikirlər irəli sürülür”.

Nüşabə Məmmədova bildirib ki, Dağlıq Qarabağ münaqişəsinin həlli ilə bağlı danışıqlar prosesində Azərbaycan dövlət rəsmiləri tərəfindən əsir və girovların “hamının hamıya” prinsipi əsasında dəyişdirilməsinə rəsmi Bakının hazır olduğu dəfələrlə səsləndirilib:

“Düşünürəm ki, hazırkı vəziyyət bu məsələni yenidən gündəmə gətirə bilər”.

Azərbaycan Milli QHT Forumunun vitse-prezidenti qeyd edib ki, 6  ildir ki, azərbaycanlı məcburi köçkünlər Dilqəm Əsgərov və Şahbaz Quliyev Ermənistan tərəfindən girovluqda saxlanılır:

“Bu şəxslər Ermənistanın işğalı altında olan Kəlbəcər rayonunda valideynlərinin məzarlarını ziyarət edərkən Ermənistan silahlı qüvvələri tərəfindən girov götürülüb,  yanlarında olan Həsən Həsənov isə qətlə yetirilib. Azərbaycanın işğal edilmiş ərazilərində yaradılmış qondarma separatçı rejimin təşkil etdiyi “məhkəmə” tərəfindən Dilqəm Əsgərov “ömürlük”, Şahbaz Quliyev isə 22 il müddətinə azadlıqdan məhrum edilib. Hər iki azərbaycanlı mülki şəxsin Ermənistan girovluğunda hər bir günü işgəncələrlə keçir. Mediada yayılan fotolar, videolar, onların girovluqda saxlandıqları müddətdə qeyri-insani rəftara, fiziki və mənəvi işgəncələrə məruz qaldığını açıq şəkildə sübut edir”.

Beynəlxalq Dialoq və İnkişaf Alyansının sədri deyib ki, 30 ildən çoxdur Ermənistanın Azərbaycana qarşı davam edən ərazi iddiaları, hərbi təcavüzü nəticəsində ölkəmizin Dağlıq Qarabağ və ətraf yeddi rayonu işğal olunub:

“Həmin ərazilərdə etnik təmizləmə nəticəsində bir milyondan çox azərbaycanlı, o cümlədən Dilqəm Əsgərov və Şahbaz Quliyevin ailə üzvləri öz doğma yurd-yuvalarından didərgin salınıb. 3888 Azərbaycan vətəndaşı itkin düşüb, girov götürülüb; onlardan 718-i mülki şəxslərdir, o cümlədən 266 qadın, 71 uşaq və 326 yaşlı şəxs itkin düşüb və girov götürülüb”.