Gələn ilin büdcəsinin Milli Məclisdə müzakirəsinin vaxtı bəlli oldu

Ens.az-ın əldə etdiyi xəbərə görə, parlamentin İqtisadi siyasət, sənaye və sahibkarlıq komitəsinin noyabrın 4-də keçiriləcək iclasında “Azərbaycan Respublikasının 2027-cı il dövlət büdcəsi haqqında” qanun layihəsi birinci oxunuşda müzakirəyə çıxarılacaq.

Büdcə layihəsi Milli Məclisin təkcə profil komitəsində deyil digər komitələrinin birgə iclaslarında da müzakirə ediləcək.

Noyabrın 5-də isə qanunverici orqanın Əmək və sosial siyasət komitəsinin toplantısı olacaq. İclasda “Dövlət Sosial Müdafiə Fondunun 2027-cı il büdcəsi haqqında” və “İşsizlikdən Sığorta Fondunun 2027-ci il büdcəsi haqqında” qanun layihələri birinci oxunuşda müzakirəyə çıxarılacaq.

Parlament komitələrində keçiriləcək müzakirələrdə maliyyə naziri Sahil Babayev və hökumətin digər üzvləri iştirak edəcəklər.

Komitələrdə müzakirələr bitdikdən sonra büdcə zərfi Milli Məclisin plenar iclaslarında müzakirəyə çıxarılacaq.

Qeyd edək ki, 2027-ci il dövlət büdcəsinin gəlirləri 39 254 000,0 min manat, xərcləri 42 400 000,0 min manat (o cümlədən mərkəzləşdirilmiş gəlirləri 38 518 425,0 min manat, yerli gəlirləri 735 575,0 min manat, mərkəzləşdirilmiş xərcləri 41 664 425,0 min manat, yerli xərcləri 735 575,0 min manat) məbləğində təsdiq edilməsi nəzərdə tutulur.