Görkəmli aktyorun anım günüdür

Bu gün görkəmli aktyor, Azərbaycanın əməkdar artisti Hamlet Xanızadənin vəfat etdiyi gündür. 

Cebhe.info xəbər verir ki, Hamlet Bəbir oğlu Xanızadə 5 iyun 1941-ci ildə Bakının Şağan qəsəbəsində anadan olub. Azərbaycan Dövlət İncəsənət Universitetini bitirib. 1961-ci ildən Akademik Dram Teatrında işə başlayıb. 

Bir çox tamaşalarda maraqlı obrazlar yaradıb.   Mehdi Məmmədov, Əliağa Ağayev, Ağasadıq Gəraybəyli, İsmayıl Osmanlı, Hökumə Qurbanova, İsmayıl Dağıstanlı kimi görkəmli aktyorlarla tərəf müqabili olub. 

İstedadlı aktyor bir sıra məşhur filmlərdə də rol alıb. Onun “Babək” filmində Xəlifə Mötəsim, “Axırıncı aşırım”da Talıbov, “Yeddi oğul istərəm” də Gizir, “Arxadan vurulan zərbə”də İmaş, “Qətl günü”ndə Sədi əfəndi və digər rolları böyük tamaşaçı rəğbəti qazanıb. 

1988-ci ildə başlanmış ictimai-siyasi proseslər bu həssas qəlbli vətənpərvər insana pis təsir etmişdi. Sovet ordusunun Bakıda törətdiyi qırğınlar Hamlet Xanızadəni sarsıtmışdı. O hadisələrdən sonra səhhgətində problem yaranan sənətkar 3 fevral 1990-cı ildə vəfat edib. H.Xanızadə Şağan kənd məzarlığında dəfn edilib.