İrəvanda Qarabağ aksiyası

İrəvanda “ərazilərin Azərbaycana qaytarılmasına” qarşı etiraz aksiyası keçirilib.

Publika.az xəbər verir ki, aksiyanı Qarabağ müharibəsi veteranlarının ictimai təşkilatları təşkil edib.

Ermənistan parlamentinin keçmiş deputatı, “and içmiş döyüşçü-xilaskarlar ittifaqı”nın banisi Ruben Qevorqyan bildirib ki, aksiyanın məqsədi Dağlıq Qarabağ münaqişəsinin ərazilərin qaytarılmasına etirazdır.

Maraqlıdır ki, Qevorqyan aksiyanın Ermənistan hakimiyyətinə qarşı yönəldilmədiyini açıqlayıb: “Məqsədimiz münaqişənin nizama salınması ilə bağlı mövqeyimizi ifadə etməkdir. Buna görə də bizim aksiyamız siyasi deyil”.

Aksiyanın təşəbbüskarlarından olan erməni ordusu haqqında filmlərin rejissoru Arşak Zakaryan ərazilərin qaytarılmasını zərərli adlandırıb.

“Ermənistanın heç bir hakimiyyətinə əraziləri qaytarmaq səlahiyyəti verilməyib. Əgər güzəştlər olacaqsa, onda bu, ikitərəfli olmalıdır”, - deyə o bildirib.

Son dövrlər Dağlıq Qarabağ münaqişəsinin ətrafında həll prosesinin başladığına dair informasiyalar yayılır. Həmsədr ölkələri, xüsusilə ABŞ-ın Ermənistandan münaqişənin həllinə razılaşmağı tələb etdiyi deyilir. İndiki situasiyada Ermənistan bu tələbin qarşısından qaça bilməsə də, əraziləri qaytarmaq da istəmir. Bu baxımdan, “aksiyanın Ermənistan hakimiyyətinə qarşı keçirilmədiyi”, sadəcə, “mövqe bildirməyə” hesablandığı diqqət çəkir. Mümkündür ki, bu aksiyanı əraziləri qaytarmaq istəməyən Paşinyan hakimiyyəti təşkil edib. Paşinyan belə aksiyalarla danışıqlar masasında “Mən razıyam, amma Ermənistan xalqı istəmir, nə edə bilərəm?!” kimi klassik tezisi irəli sürə bilər.