![İşsizlərə şad xəbər – Yeni iş yerləri təklif olunacaq](https://ens.az/images/news/182e2107ff10f91cd7e09f480fe7b301.jpg)
İşsizlərə şad xəbər – Yeni iş yerləri təklif olunacaq
Bu il 300-ə yaxın işsiz vətəndaş yol infrastruktur layihələrinə cəlb olunacaq.
Bu barədə “Azərbaycan Avtomobil Yolları” Dövlət Agentliyinin İctimaiyyətlə Əlaqələr Şöbəsindən BAKU.WS-ə məlumat verilib.
Verilən məlumata görə, Azərbaycanda sosial siyasətin əsas istiqamətlərindən biri də işsizliyin aradan qaldırılması, məşğulluğun təmini və bu istiqamətdə layihələrin daha da genişləndirilməsidir.
Dövlət siyasətinin əsas prioriteti hesab olunan işsiz və işaxtaran vətəndaşların sosial müdafiəsinin gücləndirilməsi layihələri çərçivəsində Azərbaycan Avtomobil Yolları Dövlət Agentliyi tərəfindən 2016-2018-ci illər ərzində 3 min nəfərə yaxın vətəndaş daimi iş yeri ilə təmin olunub.
Azərbaycan Respublikasının dövlət büdcəsində dövlət əsaslı vəsait qoyuluşu (investisiya xərcləri) hesabına Azərbaycan Avtomobil Yolları Dövlət Agentliyi tərəfindən həyata keçirilən yol infrastrukturu layihələri çərçivəsində 2018-ci ildə 615 nəfər vətəndaş daimi iş yeri ilə təmin olunmuş, 470 nəfər isə müqavilə əsasında yol tikintisi işlərinə cəlb edilib.
Cari ildə də daxili investisiya hesabına həyata keçirilən və keçiriləcək yeni yol infrastrukturu layihələrində çalışmaq üçün müqavilə ilə daha 300 nəfərə yaxın vətəndaşın işlə təmin olunması nəzərdə tutulur.
Yeni yol infrastrukturu layihələri aşağıdakılardır:
Bakı-Quba-Rusiya Federasiyası ilə dövlət sərhədi yeni avtomobil yolu;
Yevlax-Zaqatala-Gürcüstan Respublikası ilə dövlət sərhədi avtomobil yolunun Xaldan-Şəki hissəsi;
Bakı-Ələt-Qazax-Gürcüstan Respublikası ilə dövlət sərhədi avtomobil yolunun Gəncə-Qazax-Qırmızı körpü hissəsi;
Ələt-Astara-İran İslam Respublikası ilə dövlət sərhədi avtomobil yolunun Astara-İran sərhədi hissəsi;
Ucar-Zərdab-Ağcabədi avtomobil yolu;
Bəhramtəpə-Biləsuvar avtomobil yolu.
Sözügedən avtomobil yollarında həyata keçiriləcək yenidənqurma və tikinti işlərinə cəlb olunması üçün yolların keçdiyi rayonlar üzrə Məşğulluq mərkəzlərində işsiz kimi qeydiyyatda olan yol fəhlələri və yol tikintisi sahəsi üzrə, yola aid xüsusi texnikaların,
maşın-mexanizmlərin idarə edilməsində təcrübəsi olan vətəndaşlar Azərbaycan Avtomobil Yolları Dövlət Agentliyinin həmin rayon və şəhərlərdə yerləşən Yol İstismarı Məhdud Məsuliyyətli Cəmiyyətlərinə müraciət edə bilərlər.
Şərhlər
Şərhləri göstər Şərhləri gizlət