Son xəbərlər
İDMAN

Nazir: "Milli komandamız da ev oyunlarını Xankəndi şəhər stadionunda keçirə bilər"

Nazir: "Milli komandamız da ev oyunlarını Xankəndi şəhər stadionunda keçirə bilər"

"Xankəndi şəhər stadionunda beynəlxalq oyunların keçirilməsi üçün hər cür şərait yaradılıb".

Ens.Az AZƏRTAC-a istinadən xəbər verir ki, bu sözləri gənclər və idman naziri Fərid Qayıbov əsaslı yenidənqurmadan sonra Xankəndi şəhər stadionunda keçirilən ilk rəsmi oyunla bağlı danışarkən deyib.

Nazir xatırladıb ki, Xankəndi azad edildikdən sonra stadionda ilk oyun 2023-cü il dekabrın 21-də keçirilib. Həmin vaxt Azərbaycan Kubokunun 1/8 final mərhələsi çərçivəsində "Qarabağ" və MOİK komandaları qarşılaşıblar: "Bundan sonra Prezidentin tapşırıqlarına əsasən, stadion yenidən quruldu. Bu yaxınlarda dövlət başçısının iştirakı ilə arenanın açılışı oldu. Artıq "Xankəndi" komandası ilk ev oyununu bu stadionda keçirir. Tribunalara çox sayda azarkeşin toplaşması hamımız üçün sevindirici haldır. Çoxdan gözlədiyimiz bir gün idi. Onu da qeyd edim ki, MOİK də gələn ildən ev oyunlarını bu stadionda keçirməyə qərar verib. Stadion UEFA-nın müvafiq kateqoriyasını almaq üçün hazırdır. Burada beynəlxalq standartlara uyğun hər cür şərait yaradılıb. Düşünürəm ki, yaxın gələcəkdə, AFFA ilə razılaşdırılmaqla, milli komandamız da ev oyunlarını burada keçirə bilər".

Fərid Qayıbov işğaldan azad edilmiş ərazilərdə uşaq futbolunun inkişafı ilə bağlı görülən işlərə də toxunub. O bildirib ki, həm Gənclər və İdman Nazirliyinin, həm də təhsil müəssisələrinin tabeliyində olan uşaq-gənclər idman məktəblərində futbol bölmələri fəaliyyət göstərir: "Dövlətin digər idman klubları, o cümlədən Ordu İdman Klubu da uşaq futboluna dəstək verir. Bununla yanaşı, demək olar ki, bütün futbol klublarının akademiyaları var və orada da inkişaf prosesi gedir. Azərbaycan çempionatları müxtəlif yaş kateqoriyaları üzrə keçirilir. Düşünürəm ki, futbolun təbliği də yaxşı aparılır. Ölkəmizdə 15 yaşadək futbolçular arasında ilk dünya çempionatı keçirildi. İnanıram ki, bunun nəticələrini də görəcəyik".

Nazir qeyd edib ki, Xankəndi şəhər stadionu bütün beynəlxalq standartlara uyğundur və UEFA-dan müvafiq kateqoriyanın alınması gözlənilir: "Düşünürəm ki, bundan sonra burada təkcə aşağı yaş qruplarının deyil, A milli komandanın da oyunları keçirilə bilər. UEFA turnirlərinin matçlarının təşkili də mümkündür".

Təsdiqlənmiş hesab

Şərhlər

0 şərh

Hələ təsdiqlənmiş şərh yoxdur.