"Ukrayna rəhbərliyi və ona dəstək verən qüvvələr hərbi əməliyyatların dayandırılmasında indiki reallıqları qəbul edərlərsə, bu ölkə ilə gələcək kompromislər mümkündür".
Oxu.Az TASS-a istinadən xəbər verir ki, bunu Rusiya Prezidenti Vladimir Putin deyib.
Dövlət başçısı Ukrayna və Rusiyanın tərəfdaşları ilə bu məsələ üzrə qarşılıqlı güzəştlərin müzakirəsini istisna etməyib. Onun sözlərinə görə, həmin kompromislər ABŞ tərəfindən irəli sürülüb və Rusiya nümayəndələri onlarla razılaşıblar. Münaqişə tərəfləri arasında qarşılıqlı güzəşt imkanı var və bu, Rusiya tərəfindən dəstəklənir.
"Sual ondan ibarətdir ki, münaqişənin digər tərəfləri - Ukrayna və bu halda onların avropalı sponsorları bu kompromislərlə razılaşmaq istəyirlərmi? Yəni onlar hərbi əməliyyatların və müharibənin dayandırılması barədə razılığa gəlmək niyyətindədirlərmi? Əgər Kiyev rəhbərliyi bu reallıqları dərk edərsə, onda bəhs etdiyimiz güzəştlər də baş tutacaq", - deyə o qeyd edib. Prezident, həmçinin vurğulayıb ki, Rusiya Avropa nümayəndələrinin Ukrayna üzrə danışıqlarda iştirakına razılaşacaq, lakin onlar əvvəlcə öz təkliflərini Moskvada müzakirə etməlidirlər.
"Biz razılaşdıq ki, Ukraynanın təhlükəsizliyi Avropanın təhlükəsizlik sisteminə daxil edilməlidir, lakin Avropanın təhlükəsizliyini onsuz müzakirə etmək qəribə olardı. Buna görə avropalıların prosesə qoşulmasına razı olduq, amma əvvəlcə onlar bunu bizimlə müzakirə etmək üçün Moskvaya gəlməlidirlər", - deyə Putin bildirib. İndiyə qədər rəsmi Moskva Rusiya, Ukrayna və ABŞ arasında keçirilən üçtərəfli danışıqlarda Avropa təmsilçilərinin iştirakına razılaşmır, ABŞ tərəfi isə onların növbəti görüşdə iştirakında təkid edirdi.
Bununla yanaşı, Putin Rusiyanın müharibəni bitirmək istəyini bəyan edib. O əlavə edib ki, Ukrayna rəhbərliyi hərbi əməliyyatlar bitdikdən sonra seçkidə uduzmaqdan qorxduğu üçün sülh istəmir.





Şərhlər
Hələ təsdiqlənmiş şərh yoxdur.
Şərh yazın
Şərh yazmaq üçün hesabınıza daxil olun və e-poçtunuzu təsdiqləyin.