Son xəbərlər
ARAŞDIRMA

Həftədə bir dəfə vurulan arıqlama preparatlarının kombinasiyası ümidverici nəticələr göstərib

Həftədə bir dəfə vurulan arıqlama preparatlarının kombinasiyası ümidverici nəticələr göstərib
Yeni klinik tədqiqatın nəticələrinə görə, iştahanı azaldan iki preparatın – kagrilintid və semaqlutidin birləşdirildiyi CagriSema inyeksiyası piylənmə və artıq çəkisi olan şəxslərdə əhəmiyyətli çəki itkisinə səbəb olub. 68 həftə davam edən sınaqda iştirakçılar bədən çəkilərinin orta hesabla 18,6–21 faizini itiriblər.

The Lancet Diabetes & Endocrinology jurnalında dərc olunan REDEFINE 9 adlı randomizə edilmiş nəzarətli tədqiqatın nəticələri göstərib ki, CagriSema preparatının həftədə bir dəfə tətbiq edilən iki aşağı dozalı variantı da nəzərəçarpacaq çəki itkisi təmin edə bilər.

CagriSema iştahanı azaldan iki dərman vasitəsinin – kagrilintid və semaqlutidin kombinasiyasından ibarətdir. Tədqiqat piylənməsi olan və ya yüksək qan təzyiqi, yuxu apnesi kimi çəki ilə əlaqəli sağlamlıq problemi müşahidə edilən artıq çəkili yetkin insanlar arasında aparılıb. 68 həftə davam edən IIIb faza klinik sınağı diabeti olmayan 309 yetkin şəxsi əhatə edib. İştirakçıların 77 faizi qadın olub, orta yaşları 48, ilkin orta çəkiləri isə 109,5 kiloqram təşkil edib.  Araşdırma Kanada, Fransa, Almaniya, Böyük Britaniya və ABŞ-da yerləşən 24 tibb mərkəzində aparılıb.  İştirakçılar təsadüfi qaydada üç qrupa bölünüblər:
• 104 nəfərə həftədə bir dəfə hər iki preparatdan 1,7 mq olmaqla CagriSema (1,7 mq kagrilintid və 1,7 mq semaqlutid) vurulub;
• 103 nəfərə hər iki preparatdan 1 mq olmaqla CagriSema (1 mq kagrilintid və 1 mq semaqlutid) tətbiq edilib;
• 102 nəfərə isə plasebo verilib.
Bütün iştirakçılar, həmçinin qidalanma və fiziki aktivliklə bağlı məsləhətlər alıblar.

Müalicəni davam etdirən iştirakçılar arasında 68-ci həftədə orta çəki itkisi CagriSema-nın 1,7 mq/1,7 mq dozalı variantında 20,7 faiz, 1 mq/1 mq dozalı variantında isə 21 faiz olub. Plasebo qrupunda bu göstərici cəmi 2 faiz təşkil edib.  Müalicəni dayandıran iştirakçılar da daxil olmaqla aparılan ikinci təhlildə isə orta çəki itkisi müvafiq olaraq 19,4 faiz, 18,6 faiz və 4,6 faiz qeydə alınıb.  Nəticələr göstərib ki, CagriSema qəbul edən iştirakçıların 95,1 və 96,3 faizində bədən çəkisi ən azı 5 faiz azalıb. Plasebo qrupunda bu göstərici 33,4 faiz olub.  Bundan əlavə, CagriSema qəbul edənlərin təxminən yarısı bədən çəkisinin ən azı 20 faizini itirib. Bu nəticə 1,7 mq/1,7 mq dozalı qrupda 51,3 faiz, 1 mq/1 mq dozalı qrupda isə 48,3 faiz təşkil edib. Plasebo qrupunda isə iştirakçıların yalnız 2,7 faizi bu səviyyədə çəki itkisinə nail olub.  Preparat qarın çevrəsinin azalmasına da təsir göstərib.  CagriSema-nın iki dozalı variantını qəbul edənlərdə qarın çevrəsi orta hesabla müvafiq olaraq 17,2 və 17,5 santimetr azalıb. Plasebo qrupunda bu azalma 3,6 santimetr olub.

Müəlliflərin fikrincə, əldə olunan nəticələr preparatın müxtəlif dozalarda tətbiqinin daha çevik və fərdi müalicə yanaşmalarına imkan yarada biləcəyini göstərir.  Bununla belə, tədqiqatçılar vurğulayırlar ki, CagriSema hələ klinik araşdırma mərhələsində olan preparatdır. Nəticələrin təsdiqlənməsi üçün daha geniş və müxtəlif əhali qruplarını əhatə edən əlavə klinik sınaqlara ehtiyac var.





Təsdiqlənmiş hesab

Şərhlər

0 şərh

Hələ təsdiqlənmiş şərh yoxdur.