Prezident fərmanı: Xidməti maşınlar azalır

Fərmana görə Nazirlər Kabineti bir ay müddətində bütün dövlət qurumu və dövlət şirkətlərində, hətta publik qurumlarda xidməti avtomobil ilə təmin edilməli olan bütün vəzifələrin siyahısını hazırlamalıdır.

Bu yeni siyahıdan kənar olan bütün xidməti maşınlar Fərmanın tələbinə əsasən dərhal özəlləşdirilməyə çıxarılmalıdır.

Axar.az xəbər verir ki, bu sözləri ekspert Osman Gündüz Prezidentin ötən gün imzaladığı Fərmanın bir bəndini şərh edərkən deyib. O bildirib ki, bir neçə gün öncə Ekologiya və Təbii Sərvətlər Nazirliyinin tullantılarla məşğul olan qurumu büdcə vəsaiti hesabına 140 000 manatlıq “Land Kruser”, bir dövlət universiteti 116 000 manatlıq “Toyota Avalon” almışdı.

“Bir iki gün öncə daha bir publik qurum da 1.4 milyona bir neçə maşın almışdı. Fərman tam doğru yanaşmadır, gözləmək olar ki, yaxın 2-3 ayda özəlləşdirməyə xeyli komfort maşınlar çıxarılacaq”.

Ekspert Rövşən Ağayev isə bildirib ki, 10 il ərzində dövlət büdcəsindən xidməti maşınlara sərf olunan xərclərin məbləği 700-800 milyon dollar çatır.

Onun sözlərinə görə, Prezidentin dünənki fərmanından sonra xidməti maşınların sayı azalacaq.