Rusiya tərəfi Ukraynanın vurduğu gəmidə 1 nəfərin öldüyünü deyir

Xəbər verdiyimiz kimi, Ukrayna hava qüvvələri Krımın Feodosiya limanında Rusiyanın “Novoçerkassk” desant gəmisini vurub.

Yeniavaz.com BBC-yə istinadla xəbər verir ki, Rusiya tərəfi də desant gəmisinin vurulduğunu təsdiqləyib.

Məlumata görə, Ukrayna Hərbi Hava Qüvvələrinin “Storm Shadow” raketləri ilə hücumu zamanı raketlərdən biri “Novoçerkassk” gəmisinə dəyib. Ukrayna zərbə nəticəsində gəminin məhv edildiyini iddia etsə də, Rusiya gəminin yalnız ciddi zərər gördüyünü bildirib. Zərbədən sonra gəmi alov alıb, sonra güclü partlayış baş verib.

Rusiya Müdafiə Nazirliyi gəmiyə endirilən zərbə nəticəsində bir nəfərin öldüyünü, dörd nəfərin isə yaralandığını bildirib. Nazirlik zərərin mahiyyəti ilə bağlı heç bir məlumat verməyib. Ancaq belə böyük partlayış gücü gəminin içərisində partlayıcı yük olmasından xəbər verir. Çünki Rusiya hərbi yüklərin daşınması üçün iri desant gəmilərindən istifadə edir.