Yeni taksilərin hansı üstünlükləri var? - Deputat

Yeni LEVC TX modelli taksilərin Bakıya gətirilməsini çox yüksək qiymətləndirirəm. Nəzərə alaq ki, bunlar tamamilə fərqli minik avtomobilidir. Fiziki cəhətdən imkanları məhdud olan insanlar rahat şəkildə ondan istifadə edə biləcəklər.

Ens.az xəbər verir ki, bunu Axar.az-a Milli Məclisin deputatı Fəzail Ağamalı LEVC TX modelli taksilərin Bakıya gətirilməsi haqda danışarkən deyib. Millət vəkilinin sözlərinə görə, paytaxtda və bölgələrdə taksi parklarının yenilənməsi bu sahənin müasirləşməsində mühüm əhəmiyyət kəsb edir:

“Vaxtilə Bakıda istismar müddəti bitmiş, şəhərin ekologiyasını zəhərləyən avtomobillərdən də taksi kimi istifadə olunurdu. Bunlar artıq ortadan qalxıb. Amma bu hal rayonlar səviyyəsində tamamilə yığışdırılmayıb. Yaxşı olardı ki, Bakı ilə bərabər digər şəhərlərimiz, rayon mərkəzlərimiz bu cür taksilərlə təmin olunsun. Eyni zamanda, bütövlükdə ölkə üzrə taksi xidmətlərinin səviyyəsi yüksəldilsin”.

Millət vəkili bildirib ki, yeni taksilərdən istifadə olunması sürücünün istədiyi qiyməti qoyması imkanlarını da aradan qaldırır:

“Son vaxtlar paytaxtda fəaliyyət göstərən özəl taksi şirkətləri qiymət məsələsində hərc-mərcliyi, anarxiyanı aradan qaldırıb. Doğrudan da burada vahid yanaşma var. Bu da taksidən istifadə edən bütün vətəndaşlarımızı məmnun edir.

Prezident özü yeni LEVC TX modelli taksilərin keyfiyyətini müəyyənləşdirmək üçün onlara baxış keçirdi və razı qaldı. Yeni taksilərin ölkəyə gətirilməsi onu göstərdi ki, bir çox ölkələrdən fərqli olaraq, Azərbaycan həm dövlət, həm də özəl şirkətlər səviyyəsində daha üstün imkanlara malikdir”.