Atlantik okeana da adını vermək istəyib - “Google” “yox” deyib

ABŞ Prezidenti Donald Tramp Atlantik okeanının adını “Tramp okeanı” ilə dəyişdirmək istədiyini, lakin “Google” şirkətinin baş direktoru Sundar Piçainin bu təklifi rədd etdiyini bildirib.

Ens.az Qafqazinfo.az-a istinadən xəbər verir ki,Tramp coğrafi adlarla bağlı təşəbbüslərindən danışarkən Piçai ilə aralarında olan söhbəti xatırladıb.

Onun sözlərinə görə, “Google Maps” vasitəsilə adın dəyişdirilməsi imkanını araşdırmaq istəyib, lakin şirkət rəhbəri okeanların bir neçə ölkəni əhatə etdiyini əsas gətirərək bu təkliflə razılaşmayıb.

Trampın sözlərinə görə, Piçai ona belə deyib: “Cənab, okeanlar fərqlidir. Onlar bir çox ölkəni əhatə edir. Xahiş edirik, bizdən bunu istəməyin”.

ABŞ Prezidenti isə bu cavabdan sonra fikrindən daşındığını bildirib: “Yaxşı, yəqin ki, bu niyyətdən əl çəkəcəyəm. Düşünürəm ki, qoy elə Atlantik okeanı olaraq qalsın”.

Tramp həmçinin Piçai və “Google”un həmtəsisçisi Sergey Brini “tamamilə parlaq insanlar” adlandırıb.

Qeyd edək ki, “The Washington Post” qəzetinin oktyabrın 10-da yaydığı məlumata görə, Tramp daha əvvəl Tennessi ştatının Klarksvill şəhərində keçirilən mitinqdə Atlantik və ya Sakit okeanlardan birinin adının “Tramp okeanı” və ya “Amerikalar okeanı” ilə dəyişdirilməsini təklif edib. Daha sonra CNN onun bu fikri zarafat kimi təqdim etdiyini yazıb.

Xatırladaq ki, Tramp administrasiyası dövründə coğrafi adların dəyişdirilməsi ilə bağlı başqa təşəbbüslər də gündəmə gəlib. “Google” ABŞ istifadəçiləri üçün Ontario gölünün adını “Amerika gölü” kimi göstərməyə başlayıb. Şirkət bunu ABŞ-nin rəsmi coğrafi adlar bazasındakı dəyişikliklərlə izah edib. ABŞ-dən kənarda olan istifadəçilərə isə hər iki ad göstərilir.