Azərbaycanda daşınmaz əmlakın lizinqinin dövlət qeydiyyatı və ləğvi elektron qayda aparılır

Əmlak Məsələləri Dövlət Komitəsi tərəfindən göstərilən xidmətlərə daşınmaz əmlakın lizinqinin dövlət qeydiyyatına alınması və bu qeydiyyatın ləğvi də aiddir.

Komitədən ONA-ya verilən məlumata görə, bu xidmətlər daşınmaz əmlakın lizinqinin dövlət qeydiyyatına alınması və qeydiyyatın ləğvi üçün müraciətlərin qəbulu, işin icra tarixi barədə bildirişlərin verilməsi, işin icrasından imtina edildiyi hallarda bu barədə xidmət istifadəçilərinin məlumatlandırılması kimi məsələləri əhatə edir. Daşınmaz əmlakın lizinqinin dövlət qeydiyyatına alınması və ləğvi xidmətləri Komitəsinin müvafiq qurumlarında (Əmlak Xidmətləri Məkanı və Daşınmaz Əmlakın Dövlət Reyestri Xidmətinin ərazi idarələrinin və ya rayon şöbələrinin inzibati binaları) və ya elektron formada göstərilir. Bu xidmətlərin göstərilməsi üçün tələb olunan sənədlərə şəxsiyyəti təsdiq edən sənəd, xidmət haqqı və dövlət rüsumunun ödənilməsi barədə sənəd, ərizə, müqavilə tərəfinin adından ərizənin verilməsi halında bu barədə səlahiyyəti təsdiq edən etibarnamə aiddir. Lizinqin dövlət qeydiyyatına alınması zamanı əlavə olaraq notariat qaydasında təsdiq edilmiş üçtərəfli müqavilə və lizinq müqaviləsi kimi sənədlər də tələb olunur. Bu xidmətlərdən elektron formada istifadə etmək istəyən müəssisə və ya təşkilat öncədən öz səlahiyyətli nümayəndəsi haqqında məlumatları və şəxsiyyət vəsiqəsinin sürətini DƏDRX-ə göndərməlidir. Xidmət istifadəçisi ərizə formasını Komitənin Elektron Xidmətlər Portalındakı (e-emdk.gov.az) “bildirişlər” bölməsindən yükləyə bilər.

Daşınmaz əmlak lizinqinin dövlət qeydiyyatına alınması və ləğvi elektron xidmətlərindən istifadə imkanına malik səlahiyyətli şəxs Elektron Xidmətlər Portalındakı (e-emdk.gov.az) 21-ci və ya 22-ci bölmələrə daxil olmalıdır. Açılan pəncərədə müvafiq məlumatları doldurduqdan sonra tələb olunan sənədlər skan olunmuş formada yüklənməlidir. Qeyd edək ki, xidmətlər 3 iş günü ərzində həyata keçirilir.  Daşınmaz əmlak lizinqinin dövlət qeydiyyatına alınması üçün 20 manat dövlət rüsumu və 20 manat xidmət haqqı tələb olunur. Xidmətin nəticəsi olaraq lizinqin dövlət qeydiyyatı haqqında Daşınmaz Əmlakın Dövlət Reyestrindən çıxarış hüquq sahibinə təqdim edilir və ya elektron imza ilə təsdiqlənməklə "Elektron hökümət" portalında yerləşdirilir və hüquq sahibinin elektron üsulla əldə etməsi imkanı təmin olunur. Daşınmaz əmlak lizinqinin dövlət qeydiyyatının ləğvi üçün isə 10 manat dövlət rüsumu, 20 manat xidmət haqqı tələb olunur. Göstərilən xidmətin nəticəsində daşınmaz əmlakın lizinqinin dövlət qeydiyyatının ləğvi barədə arayış ərizəçiyə təqdim edilir.