Uzunluğu 206 sm olan, ən zəhərli sürünənlərdən sayılan boz rəngli Qafqaz gürzəsi 12 ildir Mirhəsən Abıyevin…
55 yaşlı Mirhəsən Abıyev Ağdamın Quzanlı qəsəbəsində yaşayır. Nə qədər qəribə səslənsə də, uşaqlıqdan ilan saxlamağa marağı olub. Həmyaşıdları köpək, quş bəsləyəndə, o, günlərini ilanlarla oynamaqla keçirib.
"Azərbaycanda 30-a yaxın ilan növü var. Onun 7-si yarımzəhərlilər sinfinə aiddir. Əslində gürzələri öldürmək düz deyil. Getdikcə nəsli tükənir. Məsələn, artıq buynuzlu gürzəyə rast gəlmək olmur" – deyə Mirhəsən Abıyev bildirir.
Həmsöhbətimiz gürzələrin mart ayının sonlarına doğru, yəni cütləşmə dövründə aqressiv olduğunu deyir. Lakin Mirhəsən Abıyev ilanı sakitləşdirməyin də çarəsini tapıb: "Rezin boruya ilan qabığı taxıram, əlimlə hərəkət etdirirəm, guya başqa erkək ilandır, döyüşmək istəyir. Qabıqdakı qoxu ilan qoxusu olduğuna görə, müqavimət göstərir, başqa bir ilan hesab edir, əlimdən alıb yıxır, gücünü göstərir ki, mən səndən güclüyəm. Ondan sonra sakitləşir".
O, qeyri-adi xüsusiyyəti hesabına tez-tez həmyerlilərinin köməyinə çatır. Belə ki, qəsəbə sakinləri evdə, şəxsi təsərrüfatlarında ilana rast gələndə Mirhəsən Abıyevə ehtiyac duyurlar. Çağırılmamış qonaqları ram edə bilən Mirhəsən, ilanları öldürməyin əleyhinə olduğundan, onları yaxalayaraq təbiətə buraxır.
Uzun illərdir ilanlarla dostluq edən Mirhəsən Abıyev təcrübələrinə əsasən bu qənaətə gəlib ki, dünyadakı bütün canlılar bir-birinə ziyan vermədən birlikdə, hətta bir damın altında belə, yaşaya bilərlər, yetər ki niyyətiniz xoş olsun. "Şirin dil ilanı belə yuvasından çıxarar" misalında olduğu kimi.
Şərhlər
Şərhləri göstər Şərhləri gizlət