Azərbaycanda “Könüllülük Həftəsi” təşkil olunacaq

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və Azərbaycan Respublikasının Gənclər Fondunun birgə təşkilatçılığı ilə keçiriləcək “Könüllülük Həftəsi” ilə əlaqədar mətbuat konfransı keçirilib. 

"Report"un məlumatına görə, tədbirdə Gənclər Fondunun icraçı direktoru Fərid Cəfərovla Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov iştirak ediblər.

C.Salmanov bildirib ki, tədbirlərə on minədək könüllü qatılacaq: "Dekabrınn 5-də Beynəlxalq Könüllülər Günü münasibətilə reallaşdırılacaq və bütün könüllülük təşkilatlarının təmsil olunacağı Azərbaycan Könüllülərinin Həmrəylik Forumunda minlərlə gənc iştirak edəcək. Həftə ərzində “Şəhidimiz”, “Könüllülük sərhəd tanımır!” devizləri altında keçiriləcək kampaniyalar çərçivəsində şəhid ailələri, xüsusi qayğıya ehtiyacı olan şəxslər ziyarət olunacaqlar. Həmçinin ağac əkilməsi, ətraf mühitin sağlamlaşdırılması, dəniz və çay sahillərinin, tarixi və turizm məkanlarının tullantılardan təmizlənməsi məqsədilə “Vətənimiz” və “Təbiətimiz” sosial aksiyaları təşkil ediləcək. Bütün könüllülər “Könüllülük Həftəsi” çərçivəsində keçiriləcək tədbirlərdə fəal iştirak etməyə dəvətlidirlər". 

F.Cəfərov isə indiyədək müxtəlif tədbirlərə 22 minədək gəncin cəlb olunduğunu vurğulayıb: "Dekabrın 6-dan 9-dək Qusar rayonunda 300 könüllü üçün təşkil ediləcək xüsusi qış düşərgəsində faydalı istirahət və əyləncə, şəxsi inkişaf imkanlari üçün şərait təmin ediləcək. Gənclər siyasətini prioritet istiqamət olaraq müəyyən etmiş, gənclərin hərtərəfli inkişafı, onların milli-mənəvi dəyərlərə sadiqlik və vətənpərvərlik ruhunda tərbiyəsi məsələsini daim diqqət mərkəzində saxlayan Azərbaycan Respublikasının Prezidenti İlham Əliyevin ölkədə könüllülük hərəkatının genişləndirilməsi, dövlət qurumlarında könüllü qruplarının təsis edilməsi və dəstəklənməsi ilə bağlı çağırışları, son illərdə respublikamızda keçirilən irimiqyaslı beynəlxalq tədbirlərdə könüllülərin yaxından iştirak etməsi, müvafiq qanunvericilik bazasının yaradılması ölkəmizdə könüllülük hərəkatının geniş vüsət almasına şərait yaradıb".

Bütün könüllü təşkilatları və hərəkatlarını, həmçinin Azərbaycanın bütün şəhər və rayonlarını əhatə edəcək “Könüllülük Həftəsi” çərçivəsində bir sıra tədbirlərin təşkili nəzərdə tutulur.