NASA-nın Curiosity aparatı Marsda 5000-ci gününü yeni möhtəşəm görüntü ilə qeyd edib

NASA-nın Curiosity Mars aparatı Qırmızı planetdə fəaliyyətinin 5000-ci gününü yeni panoram görüntü ilə qeyd edib. Aparatın çəkdiyi görüntülərdə onun Mars səthindəki izləri, Şarp dağı və Geıl kraterinin geniş mənzərəsi əks olunub. Curiosity hazırda “Chocolatal” ləqəbi verilmiş qumlu tir üzərində dayanaraq Marsın ətraf mənzərəsini çəkib. Aparat panoram görüntüləri müxtəlif vaxtlarda — səhər və günortadan sonra — qara-ağ naviqasiya kameralarından istifadə etməklə əldə edib.

İlk panoram görüntü 30 avqust 2026-cı ildə, Marsın yerli vaxtı ilə saat 09:56-da çəkilib. Bu tarix Curiosity-nin Marsda fəaliyyətinin 5000-ci soluna, yəni Mars gününə təsadüf edib. İkinci panoram isə 2 sentyabr 2026-cı ildə, saat 17:39-da — missiyanın 5003-cü solu zamanı çəkilib. Görüntülər Yerə çatdıqdan sonra iki panorama vahid mənzərədə birləşdirilib. Daha sonra təsviri daha aydın və bədii şəkildə təqdim etmək üçün görüntüyə rənglər əlavə olunub. Səhər çəkilmiş hissə mavi, günortadan sonra çəkilmiş panorama isə sarı rənglə göstərilib. Nəticədə Marsın səthində çəkilmiş görüntü açıqca poçt kartını xatırladan panoram görünüş alıb. NASA daha əvvəl də Curiosity-nin görüntülərindən oxşar üsulla istifadə edib. Belə görüntülərdən biri 2021-ci ilin noyabrında çəkilib.

Yeni panoramın ön hissəsində Curiosity-nin göyərtəsi və müxtəlif avadanlıqları aydın görünür. Görüntüdə aparatın UHF antenası da əks olunub. Konserv qutusunu xatırladan bu antena Curiosity-yə məlumatları Marsın orbitində hərəkət edən kosmik aparatlara ötürməyə imkan verir. Aparatın arxa hissəsində isə onun əsas enerji mənbəyi olan qanadcıqlı Çoxmissiyalı Radioizotop Termoelektrik Generatoru (MMRTG) görünür. Nüvə enerjisi ilə işləyən MMRTG Curiosity-ni elektrik enerjisi ilə təmin edir.

Aparatın arxasında onun Mars səthində buraxdığı təkər izləri də görünür. Bu izlər Marsın relyefi boyunca uzaqlara doğru uzanaraq tədricən gözdən itir.

Curiosity hazırda Geıl kraterinin daxilində yerləşən Şarp dağının aşağı ətəklərini araşdırır. Təxminən 5 kilometr hündürlüyə malik Şarp dağı Geıl kraterinin daxilində yerləşir. Curiosity-nin hazırkı mövqeyindən çəkilmiş panorama kraterin dibinə doğru aşağı istiqamətlənmiş mənzərəni göstərir. Uzaqda Geıl kraterinin kənarları üfüq xəttində yalnız zəif şəkildə görünür.  Curiosity aparatı NASA-nın Kaliforniya Texnologiya İnstitutunun (Caltech) idarə etdiyi NASA-nın Reaktiv Hərəkət Laboratoriyası (JPL) tərəfindən hazırlanıb.  Missiya NASA-nın Vaşinqtondakı Elm Missiyaları Direktorluğunun rəhbərliyi ilə JPL tərəfindən idarə olunur və NASA-nın Marsın Tədqiqi Proqramı çərçivəsində həyata keçirilir.

mənbə: scitechdaily.com