Son xəbərlər
CƏMİYYƏT

Smartfonu olmayanlar terminallarda necə ödəniş edəcəklər?

Smartfonu olmayanlar terminallarda necə ödəniş edəcəklər?

Ödənişlərin təhlükəsizliyinin artırılması və qanunvericiliyin tələblərinə uyğun olaraq terminallar vasitəsilə nağd vəsaitlərin qəbulu üzrə yeni qayda tətbiq olunur.

Qaydaya əsasən, 500 manatdan artıq məbləğdə ödəniş və ya pul köçürməsi həyata keçirmək istəyən istifadəçilər şəxsiyyətlərini müvafiq rəqəmsal platformalar vasitəsilə təsdiqləməlidirlər.

"Milliön" terminallarında təsdiq prosesi "Bir ID", SİMA tətbiqi və ya "MyGov" vasitəsilə həyata keçirilir. "Bir ID" ilə təsdiq prosesi "Birbank" tətbiqi üzərindən edilə bilər.

Maraqlıdır, 500 manatdan artıq məbləğdə ödəniş və ya pul köçürmələri etmək istəyən, lakin ağıllı telefonu, smartfonu olmayan vətəndaşlar üçün hər hansı alternativ nəzərdə tutulurmu?

Məsələ ilə bağlı "Milliön" platformasının mətbuat xidmətindən Oxu.Az-ın sorğusuna cavab olaraq bildirilib ki, smartfondan istifadə etməyən ödəyicilər üçün hazırda alternativ identifikasiya üsulu, o cümlədən fərdi məlumatların birbaşa əl ilə daxil edilməsi imkanı nəzərdə tutulmayıb:

"500 AZN-dən yuxarı məbləğdə pul köçürmələrinin həyata keçirilməsi zamanı ödəyicinin şəxsiyyətinin eyniləşdirilməsi (identifikasiyası) tələb olunur. Ödəyicilərin eyniləşdirilməsi üçün "Bir ID", SİMA və "MyGov" platformalarının təqdim etdiyi həllərdən istifadə olunur. Smartfondan istifadə etməyən ödəyicilər üçün hazırda alternativ identifikasiya üsulu, o cümlədən fərdi məlumatların birbaşa əl ilə daxil edilməsi imkanı nəzərdə tutulmayıb. 500 AZN-dək olan əməliyyatlar isə ödəyicinin identifikasiyası aparılmadan həyata keçirilə bilər".

Təsdiqlənmiş hesab

Şərhlər

0 şərh

Hələ təsdiqlənmiş şərh yoxdur.