ABŞ administrasiyası otuza yaxın səfirini dəyişdirəcək

ABŞ administrasiyası xaricdəki 30-a yaxın diplomatik elçisini geri çağırmağı planlaşdırır.

Ens.az Oxu.az-a istinadən xəbər verir ki, bu barədə "Associated Press" nəşri ABŞ Dövlət Departamentinin iki rəsmisinə istinadən məlumat verib.

Onların sözlərinə görə, diplomatlar səlahiyyət müddətlərinin 2026-cı ilin yanvar ayında başa çatacağı barədə ötən həftə məlumatlandırılıb. Onların hamısı vəzifələrinə ABŞ-nin keçmiş prezidenti Co Baydenin administrasiyası dövründə təyin ediliblər.

Agentliyin mənbələri qeyd ediblər ki, geri çağırılan nümayəndəlik rəhbərlərinin diplomatik xidmətdəki fəaliyyətləri sonlandırılmayacaq. Onlar arzu etdikləri təqdirdə Vaşinqtona qayıdıb başqa vəzifələr tuta bilərlər.

ABŞ Dövlət Departamenti səfirlərin dəqiq sayını açıqlamayıb, lakin izah edib ki, bu cür kadr dəyişiklikləri istənilən administrasiya üçün standart təcrübədir.

"Associated Press" qeyd edir ki, geri çağırılma halları daha çox Afrika ölkələrinin payına düşüb: Burundi, Kamerun, Kabo-Verde, Qabon, Kot-d'İvuar, Madaqaskar, Mavriki, Niger, Nigeriya, Ruanda, Seneqal, Somali və Uqanda da daxil olmaqla, 13 ölkədə səfirlər dəyişdiriləcək.

İkinci yerdə Asiya gəlir ki, burada altı ölkə - Fici, Laos, Marşal Adaları, Papua-Yeni Qvineya, Filippin və Vyetnamda səfirlərin əvəzlənməsi nəzərdə tutulur.

Bundan əlavə, rotasiyalar dörd Avropa ölkəsinə - Ermənistan, Makedoniya, Monteneqro və Slovakiyaya, iki Yaxın Şərq ölkəsinə - Əlcəzair və Misirə, Cənubi və Mərkəzi Asiya ölkələrinə - Nepal və Şri-Lankaya, eləcə də Qərb yarımkürəsi ölkələrinə - Qvatemala və Surinama şamil olunacaq.