![“Şirməmməd Hüseynov” mükafatının Əsasnaməsi təsdiqlənib - Kimlərə veriləcək?](https://ens.az/images/news/6afbce13449caf703bfc83df460b651b.jpg)
“Şirməmməd Hüseynov” mükafatının Əsasnaməsi təsdiqlənib - Kimlərə veriləcək?
Parlament Jurnalistləri Birliyinin (PJB) təsis etdiyi “Şirməmməd Hüseynov” mükafatının Əsasnaməsi təsdiq edilib.
Trend-in məlumatına görə, bunu birliyin rəhbəri Elşad Eyvazlı deyib.
Onun sözlərinə görə, bununla bağlı PJB İdarə Heyəti qərar qəbul edib: "Əsasnaməyə görə, mükafatın məqsədi jurnalistika sahəsində xidmətləri olan şəxslərin fəaliyyətini dəyərləndirmək, jurnalistikanın cəmiyyət həyatındakı rolunun artırılmasını stimullaşdırmaqdan ibarətdir. “Şirməmməd Hüseynov” mükafatı fəaliyyəti və yaradıcılığı ilə jurnalistikanın inkişafına töhfə vermiş, jurnalistikanın inkişafı sahəsində yüksək xidmətləri olmuş, eləcə də jurnalistika sahəsinin zənginləşdirilməsi və inkişafına xidmət edən, jurnalistikanın tədrisi sahəsində qazandıqları mühüm nailiyyətlərə görə fərqlənən şəxslərə veriləcək. Azərbaycanla bağlı xarici mediada çıxış edən əcnəbi vətəndaşlar və fəaliyyətində peşə prinsiplərinə riayyət etməsi ilə fərqlənən jurnalistlər də namizəd ola bilərlər”.
E.Eyvazlı əlavə edib ki, “Şirməmməd Hüseynov” mükafatına namizədlərin müəyyən edilməsi məqsədilə PJB İdarə Heyətinin qərarı ilə 5 nəfərdən ibarət Ekspert Komissiyası yaradılıb: “Komissiyanın sədri tanınmış jurnalist Elşad Paşasoydur”.
Xatırladaq ki, Azərbaycanın görkəmli alimi və mətbuat tədqiqatçısı, Ali Media Mükafatı laureatı, Prezident təqaüdçüsü, BDU-nun mətbuat tarixi və ideoloji iş metodları kafedrasının professoru Şirməmməd Hüseynov bu ilin iyunun 24-də 95 yaşında vəfat edib.
Şərhlər
Şərhləri göstər Şərhləri gizlət