Turistləri 2020-ci ildən Komodo adasına buraxmayacaqlar

İndoneziyanın yerli hakimiyyət orqanları varanların oğurluq hallarının artması səbəbindən 2020-ci ilin yanvarından başlayaraq Milli Komodo Parkını turistlərin üzünə bağlamaq qərarına gəlib.

AZƏRTAC “Daily Mail” qəzetinə istinadla xəbər verir ki, brakonyerlər tərəfindən oğurlanan varanların hər biri 35,5 min dollara satılır. Parkın bağlanması barədə qərar qaçaqmalçıların Cənub-Şərqi Asiya ölkələrinə 41 komodo varanı satmaq cəhdindən sonra qəbul edilib.

Komodo parkına turist səfərlərinin qadağan olunması adada varanların qorunması və onların populyasiyasının artması üçün şərait yaratmağa imkan verəcək. Yerli hakimiyyət adanın nəinki faunasını, həm də florasını qorumaq məqsədi ilə təbiəti mühafizə tədbirlərini də gücləndirib.

Yırtıcı komodo varanı hazırda yaşayan kərtənkələlər arasında ən irisidir. Bir dəfəyə 80 kiloqram ət yeyə bilən sürünənlərin uzunluğu 3 metrdən artıq, çəkisi isə 150 kiloqrama qədər ola bilir.