Kişilər partnyorlarının menopauza dövrünə hazır olmadıqlarını düşünürlər

Qadınların menopauza dövründə yaşadığı dəyişikliklər onların kişi partnyorlarına da təsir edir. Lakin yeni araşdırma göstərir ki, kişilərin əksəriyyəti bu mərhələdə partnyorlarına dəstək olmaq istəsələr də, menopauza haqqında kifayət qədər məlumata malik olmadıqlarını və özlərini buna hazır hiss etmədiklərini bildirirlər.

Şimali Amerika Menopauza Cəmiyyətinin məlumatına görə, tədqiqatın nəticələri 2026-cı il oktyabrın 20-dən 24-dək ABŞ-nin San-Dieqo şəhərində keçiriləcək Menopauza Cəmiyyətinin 2026-cı il üzrə illik toplantısında təqdim olunacaq.

İndiyədək menopauzanın qadınlara təsiri, eləcə də isti basmalar, əhval dəyişiklikləri, yuxu problemləri və cinsi istəyin azalması kimi əlamətlər geniş şəkildə araşdırılıb. Bununla belə, menopauza yalnız qadınların deyil, bütövlükdə ailənin həyatına təsir göstərir. Kişi partnyorların bu dövrdə yaşadıqları təcrübə və qarşılaşdıqları çətinliklərə dair araşdırmalar isə məhduddur. Məhz bu səbəbdən yeni tədqiqatda Kanada və Böyük Britaniyada yaşayan kişilərin partnyorlarının menopauza keçidini necə qarşıladıqları, bu barədə bilik səviyyələri, münasibətlərə təsir, dəstək axtarışı və maarifləndirmə ehtiyacları öyrənilib.

Araşdırma çərçivəsində menopauza dövrünü yaşayan və ya bu mərhələni artıq keçmiş qadınların 100-ə yaxın kişi partnyoru arasında sorğu keçirilib. İştirakçılardan menopauza haqqında məlumatlılıqları, münasibətlərində baş verən dəyişikliklər, ünsiyyət, dəstək axtarışı və maarifləndirici resurslara ehtiyacları barədə məlumat vermələri istənilib.

Kişilərin əksəriyyəti menopauza haqqında kifayət qədər məlumatlı deyil

Sorğunun nəticələrinə əsasən, Kanadada menopauza haqqında bilik səviyyəsi ilə bağlı suala cavab verən kişilərin 68 faizi partnyorlarının bu mərhələyə keçidindən əvvəl menopauza barədə az məlumatlı olduqlarını və ya ümumiyyətlə məlumatlarının olmadığını bildirib. Böyük Britaniyada respondentlərin yalnız 43 faizi partnyorlarına effektiv dəstək göstərmək üçün menopauzanı kifayət qədər yaxşı anladıqlarını qeyd edib. 

Tədqiqat kişilərin dəstək ehtiyaclarının tam qarşılanmadığını da üzə çıxarıb. Böyük Britaniyada respondentlərin 50 faizi kişilərin partnyorlarının menopauza dövründə kifayət qədər dəstək almadığını bildirib. Kanadada sorğuda iştirak edən kişilərin 88 faizi bu məsələ ilə bağlı indiyədək heç vaxt dəstək axtarmadığını qeyd edib. Bununla belə, respondentlərin 90 faizi xüsusi dəstək proqramının faydalı ola biləcəyini və ya müəyyən dərəcədə kömək edə biləcəyini bildirib.

Tədqiqatın nəticələrinə əsasən, kişilərin menopauza dövrü ilə bağlı təcrübələrində dörd əsas istiqamət ön plana çıxıb:

• Yaxınlığın və fiziki təmasın azalması: Partnyorlar arasında intim münasibətlərin və fiziki yaxınlığın dəyişməsi.

• Dəstək göstərmək istəyi, lakin məlumatsızlıq: Kişilərin partnyorlarına kömək etmək istəmələri, amma bu mərhələdə necə davranmalı olduqlarını bilməmələri.

• Emosional gərginlik və münasibətlərdə çətinliklər: Əhval dəyişiklikləri və münasibətlərdə yaranan yeni vəziyyətlərin emosional təsirləri.

• Kişilərə yönəlmiş maarifləndirmə və dəstək imkanlarının azlığı: Menopauza haqqında kişilərin məlumat əldə etməsi və müvafiq dəstək alması üçün resursların məhdud olması.

Tədqiqatın müəllifi, qadınları, onların ailə üzvlərini və iş yerlərini menopauza haqqında məlumatlandıran MyMenopauseGP platformasının yaradıcısı doktor Amobi Onumaeme bildirib ki, menopauza uzun illər əsasən qadınların yaşadığı bir proses kimi müzakirə edilsə də, qadınlar bu mərhələdən təcrid olunmuş şəkildə keçmirlər. Onun sözlərinə görə, menopauza münasibətlərə, ailələrə və hətta iş mühitinə təsir göstərə bilər. Qadınların menopauza haqqında məlumatlandırılması sahəsində irəliləyiş əldə olunsa da, kişilərin bu müzakirələrə cəlb edilməsi istiqamətində görüləsi işlər hələ çoxdur.  Doktor A. Onumaeme qeyd edib ki, kişilərin əksəriyyəti sevdikləri qadınlara dəstək olmaq istəyirlər, lakin baş verən dəyişiklikləri hər zaman anlamır və necə davranmalı olduqlarını bilmirlər. O əlavə edib ki, kişilərin də bu proses haqqında məlumatlandırılmasının və müzakirələrə cəlb edilməsinin vaxtı çatıb.

Tədqiqatın nəticələri “Unudulmuş tərəfdaş: menopauza dövründə kişi partnyorların təcrübələri, məlumatlılığı və dəstək ehtiyaclarına dair ölkələrarası sorğunun nəticələri” adlı təqdimat çərçivəsində müzakirə olunacaq. Menopauza Cəmiyyətinin tibbi direktoru doktor Stefani Fobionun sözlərinə görə, menopauzanın qadınların həyatına təsiri tez-tez müzakirə edilsə də, qadının partnyoru olduqda bu proses cütlük üçün də ortaq təcrübəyə çevrilir. Onun fikrincə, menopauza münasibətlərdəki dinamikanı dəyişə, cinsi yaxınlığa təsir göstərə və gözlənilməz gərginliklər yarada bilər. Doktor S. Fobio bildirib ki, partnyorlarının əhval dəyişiklikləri və əsəbiliyi ilə qarşılaşan, eyni zamanda cinsi istəyin azalması səbəbindən özlərini rədd edilmiş hiss edən kişilərin çaşqınlıq və narahatlıq yaşaması qeyri-adi hal deyil. O vurğulayıb ki, təəssüf ki, kişilərin bu dəyişiklikləri anlamaq və onların öhdəsindən gəlmək üçün müraciət edə biləcəkləri etibarlı məlumat mənbələri çox deyil.

Araşdırma menopauza dövründə qadınlara göstərilən dəstəyin yalnız tibbi əlamətlərin idarə olunması ilə məhdudlaşmamasının, həmçinin partnyorların məlumatlandırılmasının və cütlüklər arasında ünsiyyətin gücləndirilməsinin vacibliyini önə çıxarır.

mənbə: medicalxpress.com